ने. सं. ११४६ बछलागा चौथी -

किपुली स्वन्हुयंकं मिसा महोत्सव

येँ – किपू नगरपालिका स्थापना दिवसया लसताय् म्हिगःनिसें किपुली किपू मिसा महोत्सव न्ह्याःगु दु । सांसद राजन केसीं उलेज्या यासें न्ह्याःगु उगु महोत्सवय् मेयर रमेश महर्जन लिसें नगरपालिकाया फुक्क पदाधिकारीपिं उपस्थित जूगु खः । महोत्सवय् नेवाः नसा ज्वलं, हस्तकला, कृषि उत्पादन, गुरुजुपिंसं पुजा यायेत माःगु हलंज्वलं, पुलांगु नेवाःतय्सं छ्यलीगु हलंज्वलं लिसें थीथी संघ संस्था थःपिनिगु उत्पादन ब्वयातःगु खः ।

अथे हे नेवाःत बुसांनिसें सीबलय् तक याइगु थीथी कर्मकाण्डया नं ब्वज्या यानातःगु दु । महोत्सवय् बजि ल्हुइगु, कपाय् फ्यनेगु, इताः कायेगु, म्हपुजा, बाह्राः पिकायेगु, भम्चापाखें ग्वय् कायेगु आदि नं ब्वज्या यानातःगु दुसा थीथी थासय् पुलांगु नेवाः कासा नं प्रदर्शन याःगु खः । महोत्सव कन्हय् शनिवाः तक न्ह्याइ ।