द्वाल्खाय् भैरव कुमारी जात्रा
येँ(नेपालभाषा टाइम्स)- द्वाल्खाय् गुंलागा दुतियानिसें भैरव कुमारी जात्रा शुरु जूगु दु । गुंलागा दुतिया (भदौ ५) निसें न्ह्याःगु थुगु प्याखं वइगु गुंलागा षष्ठि (भदौ ९) तक न्ह्याइ । न्यासः दँ स्वयां पुलांगु व नेपालय् गनं नं मदुगु प्याखंकथं कयातःगु थ्व प्याखं बहनिसिया ९ ताः इलंनिसें सुथसिया करिब ४ ताः ईतक द्वाल्खाया थीथी थासय् क्यनेगु याना वयाच्वंगु भीमेश्वर नगरपालिका २ वडाअध्यक्ष विराज श्रेष्ठं कनादीगु दु । चछियंकं क्यनीगु थ्व प्याखं जात्रा यानाः विधिपूर्वक क्यनेगु याना वयाच्वंगु दु । द्वाल्खाया भैरव कुमारीया थ्व प्याखं युद्ध शैली बाजंलिसें क्यनाः जात्रा यायेगु याना वयाच्वंगु दु ।
भैरव कुमारीलिसें थीथी द्यः गणसहितया थ्व प्याखं द्वाल्खाया थीथी त्वालय् व अन च्वंगु दबुलिइ न्यान्हुतक छगू हे इलय् क्यनेगु याइ । थःगु हे बिस्कं कथंया महत्व व पौराणिक बाखनय् आधारित थ्व प्याखं द्वाल्खाया स्थानीय शिवभक्ति परिवारया छेँजःपिंसं सहभागि जुइगु परम्परा दया वयाच्वंगु दु ।
प्याखनय् दकलय् न्ह्यःने सेना व वयां लिउ भैरव व कुमारी थःथःगु हे भूमिकाकथं प्याखं हुहुँ वनेगु याइ । थथे प्याखं हुला वनेगु झ्वलय् युद्धया कला कौशलया शैलीइ प्याखं हुला वनेगु थ्व प्याखं अर्थात जात्राया विशेषता खः ।
जात्राज्वःछि मिसापिं व्रत च्वनेगु नं परम्परा दुसा थथे व्रत च्वन धाःसा थःगु मनोकांक्षा पूवनी धइगु नं जनविश्वास दया वयाच्वंगु दु । स्थानीय मिसापिं व्रत च्वनीगु व भैरव कुमारीया दर्शनलिसें प्रसाद ग्रहण यायेगु परम्परा दया वयाच्वंगु दु ।
तान्त्रिक विधि पूवंकाः शुरु यायेमाःगु जात्रा जूगुलिं व्रत च्वनीपिं मिसापिं न्हिछितक द्यां लानाः च्वनेगु व टासिचा त्वालय् च्वंगु गुथि छेँय् भेला जुइगु परम्परा दु । प्याखं सिधयेकाः याइगु पुजा विधि सिधयेकाः जक व्रत च्वंपिंसं नयेगु चलन दु ।
LEAVE YOUR COMMENTS