‘करं यानाः संघीयता खतराय्’

येँ – थौंकन्हय् थीथी प्रदेश व स्थानीय सरकारतय्सं अनेक कथं कर म्हयेगु ज्या यानाच्वंगु व उकिया विरोधय् थाय्थासय् जुयाच्वंगु प्रदर्शनया कारणं देशय् वयेधुंकूगु संघीयता हे उल्टे जूगु खतरा वयाच्वंगु खँ नेकपाया अध्यक्ष लिसें पुलांम्ह प्रधानमन्त्री पुष्पकमल दाहालं कनादीगु दु । वीरगंजय् उद्योग व्यवसायीतलिसे खँ ल्हासें वय्कलं थ्व खतराया ‘सुचं’ बियादीगु खः ।

वय्कःयात नापलाः वःपिं स्थानीय उद्यमी व्यवसायीतय्सं देशय् संघीय व्यवस्था वयेवं स्थानीय सरकार व प्रदेश सरकारं थीथी कथंया कर लगे यानाः थःपिनि व्यवसाय हे चौपट याना बिउगु गुनासो याःगु खःसा उकियात हे लिसः बी कथं अध्यक्ष दाहालं थ्व निखें स्वखें कयाच्वंगु कर व उकियात कयाः प्वंकाच्वंगु असन्तुष्टिं यानाः अन्ततः संघीयता हे खारेज जुइगु खः ला धइगु शंका जूगु बिचाः प्वंकादीगु खः ।

थौंकन्हय् थ्व बिचाः थःत जक मखु प्रधानमन्त्री लिसें नेकपाया मेम्ह अध्यक्ष खड्ग ओलीयात समेत जुयाच्वंगु खँ नं वय्कलं कनादिल ।
आः कयाच्वंगु थ्व करया हे कारणं जनताय् राजनीतिक परिवर्तन प्रति हे वितृष्णा ब्वलनीगु खः ला धइगु चिन्ता समेत जूगु खँ नं वय्कलं कनादिल ।

करया समस्यायात वय्कलं पृथ्वीनारायण शाहया नेपाः एकीकरण अभियानलिसे नं तुलना यानाः स्वयादिल । न्हापा देशय् बाइसे चौबिसे राज्य दुगुलिं जनतां तनहुँलय् वंसा अन कर पुले माःगु, गोरखा वंसा अन कर पुले माःगु, येँय् वंसा अन कर पुले माःगु, यलय् वंसा अन कर पुले माःगु…न्ह्याथाय् वंसां कर जक पुले माःगु जुयाः जनता हैरान जुयाच्वंगु इलय् पृथ्वीनारायण शाहं बरु थ्व टुक्रा टुक्रा राज्ययात छथाय् तयाः छगू हे बल्लाःगु राज्य दयेकल धकाः छथाय् जक कर पूसां गाइ धकाः हे राज्य त्याकेत ताःलाःगु खनेदु धइगु थःगु विश्लेषण नं न्ह्यब्वयादिल ।

जनतायात अःपुइमा धकाः संघीय व्यवस्था हयागु खःसां करं यानाः समस्याय् लाका बिउगु खँ नं वय्कलं कनादिल ।

कर विरुद्ध थौं किपुली ¥याली

किपू नगरपालिकां मालपोत कर मकासे भूमि कर काःगु विरोधय् थौं किपूया जनतां विरोध ¥याली पिकासें मेयर रमेश महर्जनयात ज्ञापन पौ बीत्यंगु दु । थ्व करं यानाः स्थानीय किसानं छेँ–बुँ मी मालीगु अवस्था वइन धासें थ्व ¥याली पिकायेत्यंगु खः । एकीकृत सम्पत्ति कर विरुद्ध संघर्ष समितिं थौं सुथय् १० बजे पांगाया धोकासि जुयाः नयाँ बजार, नगां दोबाटो चाःहिलेधुंकाः
मेयर महर्जनयात ज्ञापनपौ बीगु तयारी यानाच्वंगु जानकारी समितिया संयोजक नजरराम महर्जनं ‘नेपालभाषा टाइम्स’ यात बियादिल ।