हनुमानध्वाखा लागाया सतःफल्चाया पसः चीकेत येँ पुरातत्वयात महानगरपालिकाया पौ

येँ- येँ महानगरपालिकाया मेयर विद्यासुन्दर शाक्यं पुरातत्व विभागया कारणं सम्पदा पुनर्निमाणय् समस्या ब्वलनाच्वंगु खँ धयादीगु दु ।
म्हिगः जनबहाःद्यःया देगः प्रवलीकरणया नितिं जूगु शिलान्यास ज्याझ्वलय् न्ववासें वय्कलं कमलपोखरी दयेकेगु ज्याय् पुरातत्व विभागया कारणं हे विवाद ब्वलंगु द्वपं बियादीगु खः ।

ज्याझ्वलय् न्ववासें वय्कलं धयादिल ‘आः पुरातत्व विभागं कमल पोखरीइ पिनेया वातावरण स्वयाः निर्णय यायेत्यंगु व जनतायात ल्वाकेत स्वयाच्वंगु दु । छु पुरातत्व विभागं अनया वातावरण स्वयेगु खःला ? जनता ल्वाकेगु खः ला ? जनता ल्वाकाः न्ह्यःने न्ह्याः वनेगु स्वल धाःसा पुरातत्व विभागयात नं कानुनी दायराय् हयेगु जुइ ।’

मेयर शाक्यं येँ महानगरपालिका दुने गुलिखे सम्पदा पुरातत्व विभागया हे कारणं पुनर्निर्माण याये मफयाच्वंगु धासें उकिया अपजस जक येँ मनपां कायेमाःगु खँ नं धयादिल ।

मेयर शाक्यं हनुमानध्वाखा दुने दुगु गुलिखे सतलय् पुरातत्व विभागं बालं बियाः नयाच्वंगु धासें अज्याःगु सतलय् तयातःगु पसः तुरुन्त चीकेत विभागयात पत्राचार यायेधुनागु खँ धासें हनुमानध्वाखा दरवारय् तयातःगु फुक्कं पसः मचीकल धाःसा स्थानीय वासिन्दा व नगरपालिका मिले जुयाः कारबाही यायेगु ख्याच्वः बियादिल ।

वय्कलं धयादिल, ‘येँ महानगरपालिकाया मौलिक संस्कृति, मौलिक सम्पदायात मौलिक रुपं कायम यायेमाःगु दु, जिमिसं पुरातत्व विभागयात पौ च्वयेधुन, हनुमानध्वाखा दुने गुलि नं सतः दुगु खः अन बालं तयाः पुरातत्व विभागं व्यापार यानाच्वंगु दु, उगु पसः बन्द या धकाः पौ च्वयेधुन । पुरातत्व विभागया ज्या व्यापार यानाः ध्यबा कमे यायेगु मखु, सतः खुल्ला जुइमाः, लँय् जुइपिंत झासु लनेगु थाय् जुइमाः धइगु येँ मनपाया धापू खः ।’

वंगु २०७२ सालया भुखाचय्क्षति जूगु जनबहाःद्यःया देगः प्रवलीकरण (रेक्ट्रोफिटिङ) यायेगु ज्याया शिलान्यास म्हिगः जूगु खः । ज्याझ्वलय् येँ मनपाया मेयर विद्यासुन्दर शाक्य लिसें राष्ट्रिय पुनर्निर्माण प्राधिकरणया प्रमुख कार्यकारी अधिकृत सुशील ज्ञवाली व भारतीय राजदूत विनयमोहन क्वात्रापिंसं नं नुगःखँ तयादीगु खः ।

नेपाःया सम्पदा पुनर्निर्माणया निंतिं भारत सरकारं ग्वाहालि बीत्यंगु ५ अर्ब ८० करोडया आर्थिक ग्वाहालि अन्तर्गत न्हापांगु परियोजना कथं जनबहाः द्यःया देगः पुनर्निर्माण जुइत्यंगु खः । भारत सरकारं बीगु ग्वाहालिं २८ गू सम्पदा पुनर्निर्माण यायेगु योजना दयेकातःगु दु ।
जनबहाः द्यःया देगः झिगूगु शताब्दीइ दयेकूगु अनुमान यानातःगु दु । छुं ई न्ह्यः जक येँ महानगरपालिकाया ग्वाहालिं जनबहाःद्यःया दिगीछेँ दयेके क्वचायेकूगु खः ।

 

 

सम्बन्धित बुखँ

LEAVE YOUR COMMENTS