झिंनिदँ न्ह्यः हे जूगु खः कोरोनाया भविष्यवाणी !

येँ- थौंकन्हय् विश्वयात हे आतंकित यानाच्वंगु कोरोना भाइरस बारे थनिं १२ दँ न्ह्यः हे छगू सफुली उल्लेख जुइधुंकूगु जुयाच्वन । अमेरिकाया च्वमि मय्जु सिल्भिया ब्राउनं सन् २००८ य् च्वयादीगु सफू ‘इण्ड अफ डेज’ या पेज नं. ३१२ य् थ्व ल्वय्या लक्षण बारे च्वयातःगु खः । थौंकन्हय् मय्जु ब्राउन व वय्कलं च्वयादीगु उगु सफू बारे विश्वन्यंकं चर्चा जुयाच्वंगु दु ।

सफुली ‘कोरोना भाइरस’ धइगु खँग्वः उल्लेख यानातःगु मदु, तर उकिया संकेत धाःसा कोरोनालिसे पाय्छि जुइक हे मिले जू । सफुली च्वयातःगु दु – ‘सन् २०२० य् निमोनिया थेंज्याःगु छगू तच्वःगु ल्वय् विश्वन्यंकं न्यना वनी । थुकिं स्वँ व सासनलीइ आक्रमण याइ, उकियात छुं नं वासलं लंके फइ मखु । थ्व ल्वय् छक्वलं न्यना वनी, अले छक्वलं तना वनी । झिदँ लिपा हानं छक्वः वइ । अले वयां लिपा सदांया लागिं तना वनी ।’

मय्जु ब्राउनया थ्व धापूयात उगु इलय् यक्वस्यां पत्याः मयाःगु खः । खतुं थःत स्वघोषित भविष्यवक्ता व आत्मालिसे खँ ल्हायेफुम्ह धकाः दावी याइम्ह ब्राउनया आपालं खँ विवादय् लायेगु याः । सन् २०१३ य् ७७ दँया वैंसय् वय्कः मंत ।

अथे हे सन् १९८१ स मेम्ह च्वमि डिन कुन्जं च्वयादीगु ‘द आइज अफ डार्कनेस’ नांगु मेगु सफुली नं छगू ल्वय्या बारे उल्लेख यानातःगु खः गुकियात उकी ‘वुहान ४००’ धइगु नां बियातःगु खः । थौंकन्हय् थ्व निगुलिं सफूया खँ ल्वाकःबाकः जुइक प्रचार जुयाच्वंगु खनेदु ।