२४ घन्टां ७ गू देय् भ्रमण

इच्छाशक्ति जक दत धाःसा मनुखं न्ह्यागुं ज्या याये फइ । इच्छाशक्ति दत धाःसा मेपिं सुनानं मयाःगु ज्या यानाः विश्व कीर्तिमान नं तयेत सफ ल जुइ । थुकिया छगू लिपांगु दसु खः हंगेरीया डेभिड कोवारी । छिं छन्हुया दुने ग्वःगु जिल्ला, अंचल वा देशय् चाःहिले फु । वा चाःहिला दी धुन । गुलि म्वाः मदुगु धकाः छिं तायेकाच्वनादीगु खःसा हंगेरीया डेभिड कोवारीयाके थुकिया लिसः दु ।

डेभिडं २४ घन्टाया दुने न्हय्गू देय् चाःहिलाः छगू न्हूगु हे कथंया विश्वयात हे चकित याःगु कीर्तिमान तःगु दु । डेभिडं हवाइजहाज, रेल, ट्रेन, कार, बस वा मोटरसाइकलय् यात्रा यानाः थ्व रेकर्ड तःगु मखसे साइकलं यात्रा यानाः रेकर्ड तःगु खः । डेभिडं थः यात्रा वने स्वयां न्ह्यः थ्व सम्बन्धय् अज्याःगु छुं विश्व रेकर्ड कायम जूगु दु ला धइगु बारे अध्ययन याःगु खः ।

सन् २०१३ य् ग्लेन बर्मिस्टर नांया मनुखं २४ घन्टाया दुने युरोपया प्यंगू देय चाःहिला विश्व रेकर्ड कायम याःगु जानकारी दयेवं उकियात त्वाःथलाः थःगु नामय् विश्व रेकर्ड यायेगु चाहना कथं डेभिडं थःगु यात्रा न्ह्याकल । थनिं खुदँ न्ह्यः बर्मिस्टरं २४ घन्टाया दुने चेक गणतन्त्र, अस्ट्रिया, स्लोभाकिया, हंगेरी चाःहिलाःतःगु रेकर्डयात डेभिडं त्वाःथःगु खः ।

पोल्याण्डं शुरु जूगु डेभिडया यात्रा चेक गणतन्त्र, स्लोभाकिया, अस्ट्रिया, हंगेरी, स्लोभेनिया, क्रोएसिया चाःहिलाः न्हूगु विश्व कीर्तिमान तःगु खः । थ्व न्हय्गू देय् चाःहिलेगु झ्वलय् डेभिडं मुक्कं ५०० किलोमिटरया यात्रा यासें गिनिज बुक अफ वल्र्ड रेकर्डय् थःगु नां दुथ्याकेत तकं सफल जुल ।

बर्मिस्टरं तःगु रेकर्ड कोस्र्टेन कोहल्लरं न्यागू देय चाःहिलाः त्वाःथःगु खःसा सन् २०१६ य् जर्मनीया माइकल मोलं खुगू देय् चाःहिलाः न्हूगु रेकर्ड तःगु खः । आः वयाः डेभिडं न्हय्गू देय् चाःहिलाः उकियात नं त्वाःथःगु दु ।

सम्बन्धित बुखँ

LEAVE YOUR COMMENTS