दुर्लभ ब्रम्हाया देगलय् हानं मूर्ति तइगु
येँ (नेपालभाषा टाइम्स)÷हिन्दू धर्मय् त्रिदेवया नां काइबलय् ब्रम्हा, बिष्णु, महेश्वर धकाः स्वम्ह द्यःया नां काइ । थ्व स्वम्ह द्यः मध्ये बिष्णु व महेश्वर (महाद्यः) या मूर्ति ला नेपालय् प्रशस्त हे दु । तर ब्रम्हाया मूर्ति वा देगः धाःसा गनं मदु । नेपाः दुने ब्रम्हाया देगः पशुपति लागा दुने छगः हे जक दु । तर अन च्वंम्ह ब्रम्हाया मूर्ति धाःसा खुया यंकेधुंकल । व नं आः मखु, ५० दँ न्ह्यः । मूर्ति खुया यंकेधुंकाः उगु देगः खाली हे जुयाच्वंगु खः ।
५० दँ न्ह्यः मूर्ति खुया यंकूगु उगु देगः धाःसा थौंकन्हय् पुनर्निर्माण जुयाच्वंगु दु । पशुपति लागाया जयवागेश्वरीइ च्वंगु उगु देगः येँ मनपां बिउगु ४० लाख तका दांया लागतय् हानं पुनःनिर्माण जुयाच्वंगु खः ।
खुया यंकूगु ब्रम्हाया मूर्ति लुइकाः गौशालास्थित महानगरीय प्रहरी वृत्तय् तयातःगु खँ येँ मनपा वडा ८ या अध्यक्ष आशामान सङ्गतं कनादीगु दु । देगःया पुनःनिर्माण क्वचायेवं ब्रम्हाया मूर्तियात देगलय् दुने तुं तयाः प्राणप्रतिष्ठा यायेगु ग्वसाः दु । देगः पुनर्निर्माणया लागि उत्खनन् याःबलय् मेगु छखा छें देगःया जग्गा क्वत्यलातःगु खनेदुगु खँ नं वडा अध्यक्ष संगतं कनादिल ।
नेपाः दुने ब्रम्हाया देगः मेथाय् गनं मदुगु खँ नं वय्कलं कनादिल । देय्या हे दुर्लभ धयातःगु थ्व मूर्ति ५० न्ह्यवंनिसें प्रहरी ज्याकुथी तयातःगु कारणं याकनं देगः दयेकाः पलिस्था यायेगु तयारी जुयाच्वंगु खँ धाःगु दु ।
वि.सं. २०२२ सालया नापीइ देगः लागाय् छेँ मदुगु खः । वि.सं. २०४२ य् धाःसा छेँ दनातःगु खनेदुगु खः । लिपा छेँथुवाः देगःया लागिं जग्गा त्वःतेत तयार जूगुलिं आः देगलं कःघानातःगु जग्गा खुला त्वःतीगु खँ नं धाःगु दु ।
ब्रम्हाया देगःया लागा न्हापा ७ आना दुगुली आः डेढ आना जक दुगु खने दयेवं स्थानीय जनतां जग्गा मालेत माग यानाच्वंगु खः ।
LEAVE YOUR COMMENTS