स्वम्हेसित दान्यहिरा सिरपाः

येँ (नेपालभाषा टाइम्स)- दान्यहिरा जीवंकाछि साहित्य सिरपाः थुगुसी कवि डा. योगेन्द्र प्रधानांगयात बीगु जूगु दु । अथे हे दान्यहिरा जीवंकाछि संगीत सिरपाः गायक जुजुकाजी रंजित व दान्यहिरा विज्ञान प्रविधि सिरपाः डा. जीवनकुमार श्रेष्ठयात लःल्हाइगु जूगु दु ।

थ्व स्वंगुलिं सिरपाः ५० द्वः तकाया खः । थ्व फुक्कं सिरपाःयात दान्यहिरा सिरपाः धायेगु याइ । थुकिया दाता भाजु यज्ञरत्न धाख्वा खः । थ्व सिरपाः नेपालभाषा एकेडेमिया दान्यहिरा सिरपाः समितिपाखें बीगु खः । थौंकन्हय् नेपालभाषा एकेडेमिया चान्सलर नं भाजु धाख्वा हे जुयादी ।

थ्वहे वइगु शनिवाः यलय् छगू ज्याझ्वःया दथुइ थ्व स्वंगुलिं सिरपाः लःल्हाइगु ग्वसाः दु ।