पदमुक्त प्रधानन्यायाधीशपाखें राष्ट्रपतिया शपथ ग्रहण
वैध कि अवैध धयागु विवाद सुरु
येँ– निक्वःगु कार्यकालया निंतिं निर्वाचित राष्ट्रपति विद्यादेवी भण्डारीं थौं शपथ ग्रहण यानादीगु दु । संविधान कथं प्रधानन्यायाधीशं शपथ ग्रहण याकेमाःगुलिं वय्कःयात गोपाल पराजुलीं शपथ ग्रहण याकादीगु खः । तर वय्कःया शपथ ग्रहण याकूगु इलय् तक पराजुलीया प्रधानन्यायाधीश पद धाःसा वनेधुंकूगु जुयाच्वन ।
न्याय परिषदं पराजुलीयात पदमुक्त याःगु खः । शपथ ग्रहण समारोहय् झायाच्वनादीगु इलय् राष्ट्रपति भवन शीतल निवासय् हे वय्कःयात पदमुक्त जूगु पत्र बिउगु खः । वय्कःयात पदमुक्त जूगु पत्र बीधुंकाः नं राष्ट्रपति भवनय् शपथ ग्रहण धाःसा जूगु खः ।
वय्कःयात पदमुक्त जूगु पत्र बिउगु समाचार थीथी अनलाइनय् वःबलय् तक राष्ट्रपति भवनय् शपथ ग्रहणया तयारी जक जुयाच्वंगु खः ।
प्रधानन्यायाधीश पराजुलीयात २१ साउनय् हे उमेरया हदबन्दी कथं पद मदयेधुंकूगु धासें पदमुक्त जूगु पत्र बिउगु खः ।
न्यायापरिषदया सचिव स्तरीय बैठकं निर्णय यासें सचिव नृपध्वज निरौलां सही यानाः उगु पौ लःल्हाःगु खः ।
आः पदमुक्त जूगु प्रधानन्यायाधीशपाखें राष्ट्रपतिं काःगु शपथ वैध जुइ कि अवैध धयागु न्ह्यसः दनावःगु दु । कानुनया जानकारतय्सं पदमुक्त जूम्ह प्रधानन्यायाधीशपाखें काःगु शपथयात कयाः न्ह्यसः धाःसा ब्वलनीगु खँ धाःगु दु । पदमुक्त जूगु पत्रया बोधार्थ राष्ट्रपति कार्यालययात नं वंगु दु, अथे खःसां राष्ट्रपतिं सिइक सिइकं छाय् हथासं शपथ ग्रहण यात धयागु चर्चा नं जुयाच्वंगु दु ।
LEAVE YOUR COMMENTS