‘चीन उच्चशिक्षा अध्ययन’ प्रदर्शनी
येँ (नेपालभाषा टाइम्स)÷ येँया हयात होटेलय् चीनिया छात्रवृत्ति परिषद् व नेपाःस्थित चीनिया राजदूतावासया मंकाः ग्वसालय् मित्रराष्ट्र चीनया विश्वविद्यालयलय् उच्चशिक्षा ब्वनेगु÷ ब्वंवनेगुया निंति जानकारी बीकथं ‘चीन उच्चशिक्षा अध्ययन’ प्रदर्शनी जुल ।
ज्याझ्वःया उलेज्या यासें मूपाहां उपप्रधान तथा परराष्ट्रमन्त्री नारायणकाजी श्रेष्ठं चीन व नेपाः दथुइ क्वातूगु सम्बन्ध दुगु व आधुनिक चीनया विकासया लागि विज्ञान व प्रविधिइ चीनं हासिल याःगु उन्नति सीकेत सयेकेत नेपाली विद्यार्थीपिंत चीनं यक्व ग्वाहालि याना वयाच्वंगु खँ धयादिल ।
ज्याझ्वलय् नेपाःया लागि चीनिया राजदूत छन सोङ्गं विश्वय् विज्ञान अध्ययनयालागि चीन अग्रणी मुलुकया रुपय् विकसित जुयाच्वंगु खँ न्ह्यथँसे चीनय् अध्ययन यानाः लिहांवःपिं नेपाःमित नेपालय् विज्ञ व विद्वानया रुपय् ज्या यानाच्वंगु खनां थः लय्ताःगु खँ धयादिल ।
उगु प्रदर्शनीइ चीनया नांजागु स्वीछगू थीथी विश्वविद्यालयं थःथःगु विश्वविद्यालयया विषेशता व अनया अध्ययन अध्यापनया बारे अवलोकनकर्तातय्त जानकारी बीगु ज्या याःगु खः ।
LEAVE YOUR COMMENTS