पद्मरत्न हने भदौ ३० गते

येँ -वरिष्ठ मानवअधिकारवादी नेता, नेवाः न्ह्यलुवाः, नेपाल संवत् आन्दोलनया प्रणेता पद्मरत्न तुलाधरया ज्याःजंक्वया लसताय् थ्वहे वइगु ने.सं. ११३८ यँलाथ्व खस्ति (भाद्र ३० गते) वय्कःत तःजिक नागरिक अभिनन्दन याइगु जूगु दु । पद्मरत्न नागरिक अभिन्दन समारोह समितिं म्हिगः भाजु तुलाधरयात अभिनन्दन ज्याझ्वः बारे जानकारी बिउगु खः । भदौ ३० गते शनिवाः येँया राष्ट्रिय सभागृहय् नागरिक अभिनन्दन ज्याझ्वः जुइ ।

थ्व लसताय् भाजु तुलाधरयात थीथी संघसंस्थापाखें हनापौ देछायेगु ज्या धाःसा मूल ज्याझ्वः छन्हु न्ह्यः हे यायेगु क्वःजिउगु दु । थुकथं भाद्र २९ गते शुक्रवाः न्हिनसिया २ ताः इलंनिसें ५ ताः ईतक येँया नेपाः ब्यांक्वेटय् भाजु पद्मरत्न तुलाधरयात इच्छुक खलः पुचः संघसंस्थापाखें हनापौ देछाये फइगु व्यवस्था याःगु दु । अन देछाःगु हनापौ मूल ज्याझ्वलय् ब्वयेगु ज्या जुइ ।

समारोह समितिया कजि लक्ष्मीदास मानन्धरं भाजु पद्मरत्न तुलाधरया ज्याःजंक्वया लसताय् साहित्यिक, सांस्कृतिक, पत्रकारिता, मानव अधिकार, शान्ति प्रक्रिया आदि थीथी झिगू विषयय् ज्याझ्वः जुइत्यंगु जानकारी बियादीगु दु । थ्व ज्याझ्वःत गन गन गबले गबले जुइ धइगु खँ निर्देशक पुचलं लिपा जानकारी बिया वनीगु खँ धाःगु दु ।