क्यानाडाया टोरन्टो विश्वविद्यालयय् समय्बजि

येँ – क्यानेडियन नेवाः गुथिपाखें टोरन्टो विश्वविद्यालयय् समय्बजि ज्याझ्वःया ग्वसाः ग्वःगु दु । ज्याझ्वलय् समय्बजिया विशेषता बारे जानकारी बीगुया नापं समय्बजि ज्वरे यायेगु तरिकाया प्रदर्शन याःगु खः । टोरन्टो विश्वविद्यालयया कुलिनारिया रिसर्च सेन्टर व रोबर्ट हो फेमिलि फाउन्डेसनया सहकार्यय् ‘समय्बजि’या म्हसीका, पाक विधिया प्रदर्शन नापं भ्वय् ज्याझ्वः याःगु खः ।

धिमे बाजं थानाः पाहांपिंत लसकुस यासें शुरु जूगु ज्याझ्वलय् विश्वविद्यालयया इतिहास विभागया डा. सराह रिचार्डसनं फाउन्डेसनं याना वयाच्वंगु थीथी गतिविधिया बारे जानकारी बिसें मंकाःकथं ज्याझ्वः याये खंगुलिं लसता प्वंकादिल । ज्याझ्वःया मेम्ह पाहां इतिहास व संस्कृति विभागया प्रा. डा. जयीता शर्मां कलिनारिया रिसर्च सेन्टरं थीथी समुदायया मौलिक व सर्वउपयोगी नसाज्वलं व उकिया पाक विधि न्ह्यःने हयेगु ज्या यानाच्वंगु धयादिल ।

विश्वविद्यालयय् नेवाः बौद्ध धर्मय् विद्यावारिधी यानाच्वनादीम्ह ईयन टर्नरं थःगु अनुसन्धन, नेपाःया यात्रा व नेवाः नसाज्वलंया विषयय् थःगु नुःखँ तयादीगु खःसा सेन्टरया हे डा. बीयट्रिक्सं केन्द्रं प्रशिक्षणलिसें उपलब्ध खाली थाय्यात किचन गार्डेनिङ यानाच्वंगु धयादिल ।
ज्याझ्वलय् मौसमि ताम्राकार व श्रीजा श्रेष्ठं येँयापुन्हिया ऐतिहासिक महत्व, समय्बजिया पौष्टिकता, सन्तुलित नेवाः नसाज्वलं, वातावरणलिसें नेवाः नखःचखःया बारे कनादीगु खःसा गुथिया न्वकु उत्तम माकजुं पावर प्वाइन्ट न्ह्यब्वयादीगु खः ।

गुथिया नायः प्रकाश प्रधानं लसकुस यानादीगु ज्याझ्वलय् मूछ्यांजे बिमल श्रेष्ठं गुथिया म्हसीकालिसें गतिविधिया बारे जानकारी बियादीगु खःसा ज्याझ्वःया कजि रिकेश श्रेष्ठं सुभाय् देछनादीगु खः । ज्याझ्वलय् ब्वति काःपिं सकसितं लप्तेय् तयाः समय्बजिलिसें अय्लाः, थ्वँ नं त्वंकूगु खःसा लिहां वनेत्ययेकाः सकलें पाहांपिंत लाखामरि बियाः विदा बिउगु खः ।

विदेशय् च्वंगु नेवाःतय् संस्थापाखें स्थानीय विश्वविद्यालयया सहकार्यय् विश्वविद्यालय परिसरय् हे थुकथंया समय्बजिया महत्व, पाक विधिया प्रदर्शन नापं सवाः नं काये फइगु ज्याझ्वः याःगु थ्व न्हापांगु ज्याझ्वः जूगु गुथिया दावी दु ।