बजारय् गुणस्तरहीन ला

ख्वप – नखःया इलय् दकलय् अप्वः उपभोग जुइगु ला खः । तर बजारय् मीत तयातःगु थ्व हे ला उपभोग्य जुयाच्वंगु मदु । सूर्यविनायक नगरपालिका क्षेत्रय् संचालन जुयाच्वंगु अप्वःथें ला गुणस्तरहीन जूगु सीदुगु दु । नगरपालिका क्षेत्रय् च्वंगु ला पसलय् मीत तयातःगु अप्वःथें ला भुजिं भुनाच्वंगु, नवःगु, बासिगु व गुणस्तरहीन जूगु धाःगु दु ।

नगरपालिकाया उपप्रमुख जुना बस्नेतया नेतृत्वय् वंगु पुचलं बजाः अनुगमन याःगु इलय् उकथंया लाः मियाच्वंगु पत्ता लगे याःगु खः । बस्नेतया नेतृत्वय् बजाः अनुगमन शाखा, स्वास्थ्य शाखाया कर्मचारीलिसें नगर प्रहरी व संचारकःमि सहितया पुचलं बजाः अनुगमन याःगु खः ।

अनुगमनया इलय् दर्ता मयासे संचालन जुयाच्वंगु पसःयात मोहनि धुनेवं दर्ता व नवीकण यायेत निर्देशन बीगुयालिसें पसलय् आवश्यक कथंया सुधार यायेत नं निर्देशन बियागु उपप्रमुख बस्नेतं कनादीगु दु । अनुगमनया इलय् मापदण्ड अःखः संचालन जुयाच्वंगु पसः न्हापांखुसी सचेत यानागु व लिपा बन्द यायेगु धाःगु दु ।