मैत्रेय युवा संघया २३ क्वःगु स्थापना दिवस

ख्वप- मैत्रेय युवा संघया नीस्वक्वःगु स्थापना दिवस वंगु शनिवाः जुल । ल्याय्म्हतय्त बुद्ध शिक्षाया माध्यमं चेतनशील दयेकेगु उद्देश्यं थनिं २३ दँ न्ह्यः स्थापना जूगु संघया स्थापना दिवस थथुबहीस्थित जयकीर्ति महाविहारय् जूगु खः । संघया अध्यक्ष जमुना गोसाईया सभापतित्वय् जूगु ज्याझ्वलय् डा. अनोजा गुरुमां मूपाहांकथं बिज्याःगु खः । संघया उपाध्यक्ष लक्ष्मीचन्द्र वज्राचार्यं लसकुस यानादीगु ज्याझ्वः पंचशील ग्रहण यासें शुरु जूगु खः ।

ज्याझ्वलय् संघया संस्थापक नायः तीर्थराज वज्राचार्यं संघं थःगु स्थापनाकालनिसें हे ख्वपया बौद्ध सम्पदा संरक्षणय् सक्रियता क्यना वयाच्वंगु धासें बुद्ध शिक्षाया प्रचार प्रसार यानाः ब्वनेकुथिइ परियत्ति शिक्षा नं संचालन याना वयाच्वंगु जानकारी बियादिल ।

निवर्तमान नायः सत्यलक्ष्मी रंजितं विद्यार्थीतय् निंतिं ध्यानया महत्व बारे कनादीगु ज्याझ्वलय् पाहांकथं झायादीम्ह ख्वप महोत्सवया संयोजक गौतम लासिवां कोरोना भाइरसया सम्भावित संक्रमणयात कयाः सतर्कता नालेमाःगु आवश्यक जूगुलिं महोत्सव स्थगित जूसां नं ल्वय् नियन्त्रणय् वयेवं महोत्सव जुइगु जानकारी बियादिसें भगवान बुद्ध विश्वया हे ज्योति जूगु विचाः प्वंकादिल ।

मूपाहां डा. अनोजा गुरमां नं परियत्ति शिक्षाया महत्वया विषयय् प्रवचन बियाबिज्याःगु ज्याझ्वलय् संघया सचिव संचित बुद्धाचार्यं वार्षिक प्रतिवेदन न्ह्यब्वयादीगु खःसा थगुनेया एसइइइ परीक्षाय् ताःलाःपिं विद्यार्थीपिं जेनिशा श्रेष्ठ व अनिक्स शाक्ययात नं हने ज्या याःगु खः । ज्याझ्वलय् संघया दुजः लूनिभा चित्रकारं सुभाय् देछानादीगु खः ।

सम्बन्धित बुखँ

LEAVE YOUR COMMENTS