नगदेशय् धर्मचक्र प्रवर्तन दिवस न्यायेकल

नगदेश – नगदेश बौद्ध समूह व बौद्ध ल्याय्म्ह पुचः नगदेशया मंकाः ग्वसालय् २६०७ क्वःगु धर्मचक्र प्रवर्तन दिवसलिसें छगू बुद्ध पुजा ज्याझ्वः याःगु दु । मुनि विहारया भिक्षुपाखें अष्टशील व पंचशील बियाबिज्याःगु ज्याझ्वलय् मध्यपुरथिमि नगरपालिकाया प्रमुख मदनसुन्दर श्रेष्ठ मूपाहांकथं झायादीगु खः ।

वय्कलं “प्रज्ञाया ज्योतिरुपी त्रिरत्नयुक्त दीप प्रज्ज्वलन यानाः धर्मचक्र प्रवर्तन दिवसया ज्याझ्वःया उलेज्या यानादीगु खःसा विहारया निंतिं आर्थिक ग्वाहालि यानादीपिं वरिष्ठ उपासक जगतबहादुर हाँयजु व उपासिका तुइलनानी सिन्केमनयात दोसल्लां न्ययेकाः सम्मान नं यानादीगु खः ।

अथे हे थेरवाद बौद्ध दायकसभा केन्द्रीय परिषद्या नायः, ज्येष्ठ उपासक नापं दाता बखतबहादुर चित्रकार व उपासक श्यामकृष्ण कालुयात नं खादां क्वखायेकाः भगवान बुद्धया मूर्ति लःल्हानाः सम्मान यानादीगु खः । समूहया कोषाध्यक्ष उपासक रत्नभक्त हाँयजुं लसकुस यानादीगु ज्याझ्वलय् केन्द्रीय दायक परिषद्या चित्रकार, डा. अनुप श्रेष्ठाचार्य, उच्च न्यायालयया पुलांम्ह न्यायाधिश लक्ष्मीकृष्ण श्रेष्ठ लगायतया वक्तातय्सं भिंतुना न्वचु बियादीगु खः ।

समूहया सचिव कृष्णकुमार प्रजापतिं बौद्ध जगतय् असारपुन्हिया महत्व व भगवान बुद्धं पंचभद्रवर्गीय भिक्षुपिंत दकलय् न्हापांखुसी धर्मोपदेश बियाः धर्मचक्र प्रवर्तन यानाबिज्याःगु ऐतिहासिक घटनायात कयाः चर्चा यानादीगु खः । थ्व हे झ्वलय् वंगु शुक्रवाःनिसें शुरु जूगु वर्षावासय् अष्टशील ग्रहण यानाः निगू दर्जन स्वयां अप्वः उपासकउपासिका उपोषथ व्रत च्वंगु खः ।

थुकथं हे धर्मचक्र प्रवर्तन दिवसया हे लसताय् मध्यपुर थिमि नपा ७ वडा व हिमाल मुटु, नेपालया मंकाः ग्वसालय् विहारय् छन्हुया निःशुल्क स्वास्थ्य शिविर जुल । नगर प्रमुख श्रेष्ठया प्रमुख आतिथ्यताय् जूगु ज्याझ्वलय् स्थानीय वडावासी लगायत जःखःच्वंपिं स्वसः स्वयां अप्वःसिया स्वास्थ्य परीक्षण यायेगु ज्या जूगु खः ।