मेलम्चीइ मवन सरकारया ध्यान 

येँ (नेपालभाषा टाइम्स)÷खुसिबालं क्षति जूगु मेलम्ची आयोजना आः गबलय् शुरु जुइ व अनया लः आः हानं गबलय् स्वनिगलय् वइगु जुइ धइगु खँ अन्यौलय् लाःगु दु । थ्व ज्यायात हानं न्ह्याकेगु लागिं मेलम्ची आयोजनां दयेकूगु कार्ययोजनायात कयाः आः तक सरकारं छुं हे कथंया निर्णय मयाःगु कारणं यानाः नं मेलम्चीया लः वइगु विषय अनिश्चित जूगु खँ आयोजनां धाःगु दु । वंगु असार १ गतेनिसें वःगु खुसिबालं मेलम्ची परियोजनाया २२ किलोमिटर क्षेत्रय् क्षति याःगु खः ।

खुसिबालं परियोजना क्षतिग्रस्त जुइधुंकाः आयोजनां ल्हानाच्वंगु सुरुङ मार्गयात सफा यानाः आःयात अस्थायी रुपं जूसां लः हयेगु कार्ययोजना सरकारयात बिउगु खः । तर सरकारं उगु कार्ययोजनायात कयाः छुं निर्णय याःगु मदुनि । आयोजनां आः वइगु चैत वैशाखय् स्वनिगलय् लः हयेगु योजना दयेकूगु खः । योजना कथं आः वइगु निलाया दुने स्वनिगलय् अस्थायी रुपं जूसां लः हये फइगु सुम्भावना दुगु खः ।

खानेपानी तथा सरसफाइ मन्त्रालयं वंगु कार्तिक महिनाय् सार्वजनिक खरिद ऐनया दफा ६६ कथं ठेक्का आह्वान यायेत प्रधानमन्त्री तथा मन्त्रिपरिषदया कार्यालययात कार्ययोजना छ्वःगु खः तर आः तक अनया लिसः वःगु मदुनि ।

मन्त्रालयं मोहनि नखः क्वचायेवं आयोजना दयेकेगु ज्या न्ह्याकेगु खँ धाःगु खः । तर आः गुकथं न्ह्याः वनेगु धइगु बारे मन्त्रालयं निर्णय याये फयाच्वंगु मदुनि । मन्त्रालयं थुकिया बारे अझ नं सहलह जुयाच्वंगु व याकनं हे निर्णय यायेगु कुतः जुयाच्वंगु खँ धाःगु दु ।

सम्बन्धित बुखँ

LEAVE YOUR COMMENTS