टोखा व बुढानिलकण्ठ नापं देय्न्यंक ७२म्हेसित कोरोनाया संक्रमण

येँ – येँया टोखा नगरपालिका व बुढानिलकण्ठ नगरपालिका नापं देय्न्यंक थप ७२म्हेसित कोरोनाया संक्रमण जूगु दु । स्वास्थ्य तथा जनसंख्या मन्त्रालयया सह प्रवक्ता समिरकुमार अधिकारीं टोखा नगरपालिका ३ व ६ नापं बुढानिलकण्ठ नगरपालिका ३या २७, ४१ व ३७दँया मिजंतय्त संक्रमण जूगु पुष्टि यानादीगु दु ।

थ्वनापं धनुषा नगराइन नगरपालिका ३या ३म्ह मिजंत, कपिलवस्तु शिवराज नगरपालिका ४, ५ व ६या ३म्ह मिजंत, बारा कलैया नगरपालिका कोटवाली–१या २म्ह मिजंत, रौतहट राजपुर फरहदवा २, ६, ८ व इशनाथ–२या २६म्ह मिजंतय्त संक्रमण जूगु दु ।

अथेहे सप्तरी डोक्नेधरी नगरपालिकाया २म्ह मिजंत, बर्दिया बासगढी–९या १म्ह मिजं, बाँके, दुधवा गाँउपालिका–२ व राप्ती सोनारी गाँउपालिका–७या ४म्ह मिजंत, बारा गडीमाई नगरपालिकाय् २१म्ह मिजंत, दैलेख नारायण नगरपालिका ४म्ह मिजंत व ढुंगेघर गाँउपालिकाया १म्ह मिसा नापं दैलेख गुराँस गाँउपालिकाय् २म्ह मिजंतय्त कोरोना भाइरसाया संक्रमण जूगु दु ।

थ्व नापं नेपालय् संक्रमित जूपिनि ल्याः ६ सय ७५म्ह थ्यंगु दु ।

ने.सं. ११४० तछलाथ्व ३ । जेठ १२