प्रा. ज्यापुयात राष्ट्रिय प्रतिभा पुरस्कार

येँ – वरिष्ठ कलाकार प्रा. गोविन्द नारायण ज्यापुयात राष्ट्रिय प्रतिभा पुरस्कार २०७५ लःल्हाःगु दु । सरकारं छुं न्हि न्ह्यव संस्कृति, कला तथा नाट्य, ललितकला व भाषा विधाय् राष्ट्रिय प्रतिभा पुरस्कार लःल्हाःगु खः । थुकी प्रा. ज्यापुयात ललितकला विधाय् थ्व पुरस्कार लःल्हाःगु खः ।

प्रधानमन्त्री केपी ओलीं भानु जयन्तीया झ्वलय् संस्कृति तथा पर्यटन मन्त्रालयं याःगु छगू ज्याझ्वःया दथुइ म्हतिं छगू छगू लाख तकाया पुरस्कार लःल्हाःगु खः । उगु हे ज्याझ्वलय् नेपालभाषाया साहित्यकार व संस्कृति अध्ययता बसन्त महर्जनयात संस्कृति विधापाखे प्रादेशिक पुरस्कार लःल्हाःगु दु ।

संस्कृति, कला तथा नाट्य, ललितकला व भाषा यानाः प्यंगू विधाय् न्हय्गुलिं प्रदेशया प्यम्ह प्यम्ह यानाः नीच्याम्हेसित प्रादेशिक पुरस्कार बिउगु खः । थ्व पुरस्कार ५० हजार तकाया खः ।