नेपाः, भारत व श्रीलंकाया क्लब दथुइ त्रिकोात्मक क्रिकेट जुइगु

येँ – श्रीलंका व भारतया क्लबत दुथ्याकाः त्रिकोनात्मक टी–ट्वान्टी धेंधेंबल्लाः जुइगु जूगु दु । महाकाली स्पोर्टस सोसाइटी व नेपालय इन्टरनेशनल इभेन्ट म्यानेजमेन्टया मंकाः ग्वसालय् थ्व धेंधेंबल्लाः जुइत्यंगु खः । धेंधेंबल्लाः वइगु माघ १ गते निसें १० गते तक जुइगु खँ धाःगु दु ।

धेंधेंबल्लाखय् नेपाः, भारत व श्रीलंकाया छगू छगू क्लबं ब्वति काइगु खँ महाकाली स्पोर्टस सोसाइटीया अध्यक्ष सुमन भट्टं पत्रकार सम्मेलन यासें जानकारी बियादीगु दु । नेपाःपाखें महाकाली स्पोर्टस क्लबं हे ब्वति काइसा श्रीलंकाया कन्दुकार व भारतया सिडब्लुटी क्लबंब्वति काइ । थ्व धेंधेंबल्लाखय् गुलि दां सिरपाः दइ धयागु धाःसा क्वःमछिउनि ।

नेपाली टिमया निंतिं पीम्ह उत्कृष्ट कासामितय्त क्याम्पय् तयाः छनोट यायेगु खँ ग्वसाः खलकं धाःगु दु । धेंधेंबल्लाया निंतिं झिंप्यम्ह कासामि व प्यम्ह वैकल्पिक कासामि ल्ययेगु ग्वसाः क्लबया दु । धेंधेंबल्लाः त्रिभुवन विश्वविद्यालयय् च्वंगु क्रिकेट मैदानय् जुइ ।