ख्वपय् पिस्तोल क्यनाः लुटपाट

ख्वप- थनया सूर्यविनायक सिपाडोलय् पिस्तोल ज्वनावःपिं छपुचलं खा व्यवसायीया छँेय् दुहां वनाः लुटपाट याःगु दु । सिपाडोलय् च्वनाच्वंम्ह व्यवसायी रामबहादुर तामाङया छेँय् चान्हय् दुहां वनाः पेस्तोल क्यनाः छेँजःपिं सकसितं खिपतं चिनाः लुटपाट याःगु खः ।
लुटेरातय्सं छेँय् च्वनाच्वंपिं झिम्हेसित खिपतं चिनाः उमिगु झिगः मोबाइल, छगः मोटरसाइकल, १८ तोला लुँ, छगू लाख ६२ हजार तका नगद यानाः १४ लाख तकां मल्याक लुटपाट याःगु खँ धाःगु दु ।

महानगरिय प्रहरी परिसर ख्वपया डिएसपी कृष्ण प्रसाइँनं धाःकथं चान्हय् साढे २ बजेपाखे लुटेरात छेँय् दुहांवःगु खः । उमिसं मू ध्वाखाया भेन्टिलेटरया न्हाय्कं तछ्यानाः ल्हाः दुछ्वयाः खापाया चुकू चायेकूगु खः ।

व्यवसायी तामाङया कथं नकाव पुनावःपिं लुटेरात मध्ये छम्हेसिनं पेस्तोल क्यंगु खःसा मेम्हसिनं नं पेस्तोल ज्वनावःगु खः, अले मेपिंसं खुकुरी, रड थेंज्याःगु हतियार ज्वनावःगु खः ।

लुटे याःवःपिं मध्ये छम्हेसिनं वने त्ययेकाः तामाङया कायया न्यतालय् चुप्पा नयावंगु खः । प्रहरी लुटेरात मध्ये सुनां व्यवसायी तामाङयात म्हसिउगु व छेँय् वयेवने याइम्ह, छेँया चुकू गन दु धयागु सिउम्ह जुइमाः धयागु अनुमान याःगु दु ।
लुटपाट जूगु निघौ लिपा घटनास्थलय् थ्यंपिं प्रहरीं आः लुटेरात मालाच्वंगु दु ।