राजपाया सरकारय् वनेत संविधान संशोधन शर्त

येँ – राष्ट्रिय जनता पार्टी नेपालया अध्यक्ष मण्डलया दुजः राजेन्द्र महतो वर्तमान अवस्थाय् पार्टी संघीय सरकारय् ब्वति काइमखु धयादीगु दु । विराटनगर विमानस्थलय् म्हिगः सञ्चारकर्मी लिसे खँ ल्हासें वय्कलं संविधान संशोधनया विषयय् लिखित प्रस्ताव वल धाःसा जक सरकारय् वने फइगु खँ स्पष्ट यानादिल ।

अध्यक्ष महतों वर्तमान सरकारय् दुहां वनेगु स्वयां नं पार्टी मू एजेन्डा संविधान संशोधन जूगु खँ कनादिसें सरकारय् ब्वति मकाःसां पिने च्वनाः धाःसा समर्थन बीगु खँ कनादिल ।

मेखे पार्टीया संयोजक महन्थ ठाकुरं धाःसा सरकारय् वनेत पार्टी इच्छुक जूगु खँ धयादीगु दु । वय्कलं सरकारय् वनेत हे पार्टी चायेकागु धासें आः थत्थें पार्टी सरकारय् वनेगु निर्णय धाःसा मयानानिगु खँ कनादिल ।

जनकपुरय् पत्रकारत लिसें खँ ल्हायेगु झ्वलय् वय्कलं धयादिल, ‘हरेक पार्टीया आज्जु सरकारय् वनेगु हे खः । राजपाया गठन नं उगु हे आज्जु कथं जूगु दु’ धयादिसें वय्कलं नं सरकारय् वनेगु निंतिं संविधान संशोधन धाःसा जुइमाःगु खँय् बः बियादिल ।

नेकपा प्रदेश २या सरकारय् मवनीगु
नेपाल कम्युनिष्ट पार्टी (नेकपा) या अध्यक्ष पुष्पकमल दाहाल ‘प्रचण्डं’ प्रदेश नं २ या सरकारय् थौंकन्हय् नेकपा वनेगु सम्भावना मदुगु खँ कनादीगु दु । संघीय समाजवादी फोरम नेपाल संघीय सरकारय् दुहांवःसां नेकपा धाःस प्रदेश सरकारय् मवनीगु वय्कलं स्पष्ट यानादीगु खः ।