जेलमुक्त जूसां महरा संसद मवं
येँ – संसद सचिवालयय् ज्या याइम्ह छम्ह मिसा कर्मचारीयात बलात्कारया कुतः याःगु द्वपनय् सफाई प्राप्त जूम्ह पुलांम्ह सभा– मुख कृष्णबहादुर महरा जेलमुक्त जूसां आः तक संसदय् धाःसा छक्वः हे दुहां वंग मदुनि । उकिया पलेसा वय्कः थःगु चुनाव क्षेत्र दाङ क्षेत्र नं. २ व थःगु जन्मस्थल रोल्पाय् चाःहिलाच्वंगु दु ।
सूत्रं धाः कथं थौंकन्हय् नं वय्कः रोल्पाय् हे झायाच्वंगु दुसा मेगु लछि ति अन हे च्वनीगु ज्याझ्वः दु । जेलमुक्त जुइवं हे वय्कःया सांसद पद नं पुनर्स्थापना जुइधुंकूगु दु । तर वय्कः संसदय् धाःसा छक्वः हे वंगु मदुनि । जेलं पिहां वयेवं दाङ झायाः अन च्वंपिं मतदाता व कार्यकर्तातय् लसकुस ज्याझ्वलय् सहभागी जुयादीगु खः । अन जुइगु हरेक ज्याझ्वलय् वय्कलं थम्हं एमसीसीयात पनेगु कुतः यानागु जूगुलिं थः विरुद्ध षडयन्त्र शुरु जूगु खः धायेगु यानादीगु दु ।
दाङ व रोल्पाय् वय्कःयात जहान सीता महरां नं नापनापं वयाः साथ बियाच्वंगु दु । न्हापा जनयुद्धया इलय् नं जहान वय्कःलिसे नापनापं हे दइगु खः ।
दाङय् मतदातायाथाय् वनाः वय्कलं थःत लाःगु द्वपंया वास्तविकता कनेगु ज्या यानादीगु खःसा अन वय्कःया समर्थनय् ततःधंगु र्याली समेत पिहां वःगु खः । थुकियात वय्कःया छबी सुधार यायेगु ज्या कथं काःगु दु । आः रोल्पा झाःम्ह वय्कः अन हे लछि ति च्वनीगु ग्वसाः दुसां अन वय्कलं यानादीगु ज्याझ्वः बारे धाःसा सुयाकें छुं जानकरी मदु । महरा गबले संसद वनी धइगु नं ठेगान मदुनि ।
LEAVE YOUR COMMENTS