अंगुलिमालया न्हूगु अवतार – बोधिसत्व

बुद्ध जीवनीइ नां वइम्ह छम्ह विशिष्ट पात्र अंगुलीमालयात कयाः आपालं बाखं च्वयेधुंकल, नाटक दयेकेधुंकल, प्याखं क्यनेधुंकल । तर उकियात चिन्तन यायेगु प्याःचाः धाःसा अझ नं तंगु मदुनि । थ्वहे झ्वलय् बज्र कला कुञ्जपाखें अंगुलिमालया बाखंयात हानं न्हूगु ढंगं न्ह्यब्वयेगु कुतः कथं न्हूगु नाटक न्ह्यब्वयेहःगु दु – ‘बोधिसत्व’ ।

टेकुया कौशी थियटरय् न्हिंन्हिं न्ह्यब्वयाच्वंगु थ्व नाटकया बाखं अंगुलिमालया जीवनी खःसां उकियात प्रस्तुत यायेगु शैलीं धाःसा दर्शकयात पूवंक हे मुग्ध याना बिउगु खनेदु ।

नाटकया मू पात्र अहिम् गुरुया तसकं यःम्ह चेला जुयाच्वनी । तर गुरुं वयात माया याःगु धाःसा वया मेपिं सहपाठीपिनि स्वये यइ मखु । उकिं उमिसं गुरुया न्हाय्पनय् अहिम् व गुरुमांया दथुइ अनैतिक स्वापू दु धकाः स्वां पुया बी । गुरु तम्वइ । उकिं गुरुं अहिम्यात थःत गुरुदक्षिणा स्वरुप १०८ पु बुरिपतिं ध्यना हजि धकाः आदेश बी । अहिम् मनूतय् बुरिपतिं ध्यँ(ध्यं तःधंम्ह हत्यारा जुइ । छन्हु लँय् वं बुद्ध नापलाइ । बुद्धं वयात हानं भिंगु लँय् हया बी । हिंस्रक अहिम् अहिंस्रक भिक्षु जुइ । बाखं क्वचाइ ।

बाखं थुलि हे जक खःसां उकियात कलाकारतय् जीवन्त अभिनय, प्रकाश व ध्वनिया गजब संयोजनं नुगलय् थीक न्ह्यब्वःगु दु । अहिम् जुयाः म्हितूम्ह कलाकार सुदनमान मुनिकारं गबलें भिंम्ह शिष्य, गबलें हिंस्रक अंगुलिमाल व गबलें बौद्ध भिक्षुया अभिनय यानाः नाटकया गुंगुलिं रस न्ह्यब्वःगु क्वातुसे च्वं । गुरुया भूमिकाय् दुम्ह युवाहाङ राईया अभिनय जीवन्त जू । मेपिं कलाकारतय्त खास भूमिका बियातःगु मदुसां सकस्यां थःथःगु थासय् न्याय याःगु खनेदु ।

थ्व बाखंयात नाट्य रुपान्तरण यानादीम्ह इँगिहोपो काँइच सुनुवारया मेहनत स्तुत्य जू । उलिमछि न्यना तयेधुनागु बाखंयात नं वय्कलं हानं न्हूगु हे ढंगया नाटक दयेकाः न्ह्यब्वयादीगु दु । थुकिया च्वमि, परिकल्पनाकार व निर्देशक चन्द्रमान मुनिकार थ्व सजिव प्रस्तुतीकरणया लागिं सुभाय्या पात्र जुयादी । नाटकय् थनिं २६०० दँ न्ह्यःया भेषभुषायात विशेष ध्यान बियात(ःगु दुसा थुकियात नेवाः भाय् नं दुथ्याः नेवाः परिवेश दुने ग्वये हःगु ल्वःवनापु ।

झीसं तःदँ न्ह्यवंनिसें न्यना वयाच्वनागु पुलांगु हे बाखंयात नं कुशल नाट्यकर्मीतय्सं गथे न्हू ढंगं रोचक व सजिव जुइक न्ह्यब्वयेफु धइगु खँया छगू नमूना नं खः थ्व नाटक । थुगु पुचःपाखें भविष्यय् थुकथंया हे मेमेगु नं प्रस्तुतीया आशा यायेगु पाय्छि हे जुइ । नाटक पुस ४ गते तक क्यनीगु ग्वसाः दु ।

सम्बन्धित बुखँ

LEAVE YOUR COMMENTS