ने. सं. ११४४ कौलाथ्व चौथी -

ब्राजिलया त्याके हे माःगु कासा

एजेन्सी- थुगुसीया विश्वकपया दावेदार मध्ये छगू ब्राजिलया निंतिं थौंया कासा महत्वपूर्ण जुइ । न्हापांगु कासाय् स्वीट्जरल्यान्डलिसे बराबरीइ म्हितूगु ब्राजिलयात थौं कोस्टारिकायात बुके फत धाःसा जक मेगु चरणय् वनेत अःपुइ ।

थौंया कासा त्याके हे माःगु दबाबय् लानाच्वंगु ब्राजिलयात थःगु मू कासामि नेयमारया फिटनेशया कारणं चिन्ताय् लानाच्वंगु दु । नेयमार स्वीट्जरल्यान्ड लिसेया कासाय् चोटग्रस्त जूगुलिं ट्रेनिङ सेशनय् हे मच्वंगुलिं वं म्हितेफइ कि फइमखु धयागु अन्योल जुयाच्वंगु दु । वंगु फेब्रुअरीइ तिनि जवगु ग्वाहालिया अपरेशन याःम्ह नेयमार थौंया कासा म्हितेमफुत धाःसा उकिं ब्राजिलया कासायात प्रभावित याइगु पक्का दु ।

मेखे कोस्टारिका थ्व कासाय् बुत धाःसा धेंधेंबल्लाखं पिने लाःवनीगु जूगुलिं वं नं थःगु पूर्वक कासा म्हितेगु कुतः याइगु जुइ । न्हापांगु कासाय् सर्विया लिसे पराजित जूगुलिं कोस्टारिकायात विश्वकपय् च्वनाच्वनेगु खःसा थौं ब्राजिलयात बुकेगु विकल्प मदु । तर इतिहासं धाःसा कोस्टारिकायात ब्राजिलया न्ह्यःने निरिह हे क्यनाच्वंगु दु । थुपिं निगू टिम दथुइ झिक्वः तक जूगु कासाय् कोस्टारिका छक्वः हे जक त्याःगु दुसा गुक्वः ब्राजिलं त्याकूगु दु ।

मेखे ब्राजिलविरुद्ध उत्कृष्ट प्रदर्शन यानावःगु स्वीट्जरल्यान्डं थौं हे सर्बियाया सामना याइ । स्वीस टिमया निंतिं थौं सर्बियायात पनेफत धाःसा जक मेगु चरणय् वनेगु लँ चाली । छगू कासा त्यायेधुंकूगु सर्बिया धाःसा समूह ‘डी’ इ ३ अंक कयाः शीर्षस्थानय् दु । सर्बियां मेगु कासा ब्राजिललिसे म्हिते मानीगु जूगुलिं निगूगु चरणय् तप्यंक वनेगु निंतिं स्वीस विरुद्धया कासा हे त्याकेगु निंतिं कुतः याइगु जुइ । थ्व कासा त्यात धाःसा सर्बिया याउँक नकआउट चरणय् थ्यनी ।

सर्बिया व स्वीट्जरल्यान्ड दथुइ आःतक छगू हे कासा मजूनिगुलिं थुपिं निगू टिम दथुइया न्हापांगु कासा स्वये लायक हे जुइ ।
मेखे अर्जेन्टिनायात निराश याःगु आइसल्यान्ड थौं नाइजेरियायात बुकेगु कुतः याइगु जुइ । अर्जेन्टिनालिसे बराबरी म्हिताः १ ल्याः कायेधुंकूगु आइसल्यान्डयात नाइजेरियात बुकेफत धाःसा निगूगु चरणय् वनेगु सम्भावना अप्वइ ।

मेखे नाइजेरियां नं थ्व कासा त्याके हे माःगु कथं म्हितीगु जुइ । मेगु कासा अर्जेन्टिना लिसे जुइगु जूगुलिं नाइजेरियायात थ्व कासा बराबरी यानां जक गाइमखु । थःगु न्हापांगु कासाय् क्रोएशिया पाखें ३–१ गोलं पराजित जूगु नाइजेरियाया थ्व कासाय् बुत धाःसा छेँ लिहां वनेगु विक्ल्प दइमखु ।