कर्मचारी मवयाः प्रदेश अस्तव्यस्त

आः करारय् जूसां कर्मचारी कयाः प्रदेशया ज्या न्ह्याकीगु

येँ – संघीय प्रणाली कथं प्रदेश सरकार गठन जूगु च्यालामछि दयेधुंकलं नं केन्द्रपाखें कर्मचारी खटे याना महःगुलिं आः प्रदेश सरकारत थःपिंसं हे करारय् जूसां कर्मचारी नियुक्ति यानाः ज्या न्ह्याकेगु तयारी याःगु दु । देय् संघीय प्रणालीइ वंसां प्रदेश सरकारयात माःगु कर्मचारी धाःसा केन्द्रं हे खटे याना हइगु व प्रदेश सरकारतय्सं कर्मचारी नियुक्ति याये मदइगु प्रावधान व्यवस्था याना तःगु दु ।

तर सरकार गठन जूगु च्याला मछि दयेधुंकलं नं सरकारं कर्मचारी धाःसा खटे याना महःगुलिं प्रदेश सरकारतय्सं यायेमाःगु ज्या फुक्क हे थाति लानाच्वंगु खँ धाःगु दु । केन्द्रपाखें कर्मचारी छ्वया महःगुलिं आः प्रदेश सरकारतय्सं थःपिंके दुगु अधिकार छ्यलाः करारय् जूसां कर्मचारी कायेगु तयारी यानाच्वंगु खँ धाःगु दु ।

छुं प्रदेशतय्सं उकिया लागिं थःपिं दुने सहलह ब्याकेधुंकूगु दुसा फुक्क प्रदेशतय्सं छक्वलं हे करारय् कर्मचारी दुकायेगु लागिं पहल नं जुयाच्वंगु सूत्रया दावी दु । उखे सरकारं धाःसा असारया मसान्तंनिसें कर्मचारी छ्वया हये धयागु खःसां उकिया व्यवस्थापन याये मफुगु जुयाः थ्वहे साउन मसान्तंनिसें कर्मचारी छ्वया हये फइ धाःगु दु ।

साउनंनिसें न्ह्याथे यानाः कर्मचारी खटे यायेगु लागिं तयारी पूरा जुइधुंकूगु खँ नं धाःगु दु । सूत्रतय्सं धाः कथं प्रदेशय् खटे याःपिं कर्मचारीत अप्वःसिनं पार्टीया शक्ति छ्यलाः थःगु सरुवा रोके याना तःगु दु । उकिं सामान्य प्रशासन मन्त्रालयं थःगु पार्टीयापिंत त्वःताः विपक्षी पार्टीया कर्मचारीतय्त खटे यायेत स्वयाच्वंगु कारणं यानाः नं थ्व ढिलाई जुयाच्वंगु खँ धाःगु दु ।कर्मचारी सरुवाय् राजनीति जूगुलिं प्रदेश सरकारं दुःख सियाच्वंगु दावी सूत्रं याःगु दु ।

स्वेच्छिक अवकासया अन्यौल
केन्द्रपाखें प्रदेशय् कर्मचारी छ्वये मफुगुया छता कारण देउवा सरकारं हःगु स्वेच्छिक अवकासया कार्यक्रम बारे वर्तमान सरकारं ठोस निर्णय याये मफुगुलिं नं खः धाःगु दु । न्हूगु सरकारं स्वेच्छिक अवकास बी फइ मखु धाःसां नं उगु अवकास कार्यक्रमयात रद्द हे धाःसा मयाःनि । गुकिं यानाः स्वेच्छिक अवकासया लागिं निवेदन तयेधुंकूपिं कर्मचारीत अन्यौलग्रस्त जुयाच्वंगु दु ।

कर्मचारी सूत्रं धाःसा स्वेच्छिक अवकासया लागिं निवेदन बिया तयेधुंकूपिनि निवेदन स्वीकृत याःगु जूसा जुनियर कर्मचारीतय्त छगू छगू तह बढुवा यानाः प्रदेशय् खटे याये फइगु खः । तर आः न न्हूपिं कर्मचारी वनेगु अवस्था दत, न पुलांपिंत छ्वये फइगु स्थिति जुयाच्वन ।

सम्बन्धित बुखँ

LEAVE YOUR COMMENTS