चीनया यानं चन्द्रमाया धू हल

एजेन्सी – चीनया चाङ ई फाइभ अन्तरिक्ष यान चन्द्रमाया ल्वहं व धू पृथ्वीइ लिहां वःगु दु । उगु अन्तरिक्ष यान बिहीवाः स्थानीय ई कथं १ः३० बजे भित्री मंगोलिया क्षेत्रय् अवतरण जूगु खः । आः हःगु चन्द्रमाया धू व ल्वहंपाखें पृथ्वीया उपग्रह व चन्द्रमाया भूगर्भबारे न्हूगु जानकारी मुंकेफइगु खँ धाःगु दु । थ्वयां ४० दँ स्वयां न्ह्यः अमेरिकाया एपोलो व सोभियत संघया लुना अभियानं जक चन्द्रमापाखें धू ज्वना वयेत ताःलाःगु दु । आः चन्द्रमापाखें सफलपूर्वक धू व ल्वहं हयेफुगुयात चीनया अन्तरिक्ष ख्यलय् अप्वया वयाच्वंगु क्षमताया प्रदर्शन कथं नं कयाच्वंगु दु ।

चीन चन्द्रमां ल्वहं ज्वना वयेत ताःलाःगु अमेरिका व सोभियत संघ धुंकाः स्वंगूगु देय् जूगु दु । वंगु नोवेम्भरया अन्त्य पाख चन्द्रमाय् छ्वःगु चाङ ई फाइभ यानया ल्यान्डर धाइगु भागं चन्द्र जःखःया क्षेत्रया अवलोकन यानाः अन थ्व सामग्री मुनाकाःगु खः । ल्यान्डरं मुनाकाःगु धू व ल्वहंया नमूनायात चन्द्रमाया कक्षय् चाःहिलाच्वंगु असेन्डर धाःगु यानय् तयाः पृथ्वीइ छ्वयाहःगु खः । ल्यान्डरं गुलि मात्राय् धू व ल्वहं मुन धयागु स्पष्ट जूगु मदुनि, तर २ निसें ४ किलो तक मुनाकाःगु अनुमान जुयाच्वंगु दु ।