नेपालय् ब्वंपिं फुक्क विशेषज्ञ चिकित्सकतय्त भारतय् मान्यता बीकेत माग
येँ- चिकित्सा शिक्षाय् नेपालं विशेषज्ञता कयातःपिं फुक्कं विद्यार्थीतय्त भारतया मेडिकल काउन्सिलं नं मान्यता बीमाःगु माग याःगु दु ।
नेपालय् थौंकन्हय् ४७ गू विषयय् स्नातकोत्तरया विशेषज्ञ शिक्षाया अध्यापन जुया वयाच्वंगु दु, तर भारतीय मेडिकल काउन्सिलं नेपालं पास यानावःगु ११ गू विषयया विद्यार्थीतय्त जक अनुमति बीगु यानाच्वंगु दु । त्रिभुवन विश्वविद्यालयं ३५ प्रतिशत व काठमाडौं विश्वविद्यालयं ४० प्रतिशत विदेशी विद्यार्थीतय् निंतिं दरबन्दी बियातःगु दु ।
नेपाल मेडिकल काउन्सिलं धाःसा भारतीय मेडिकल काउन्सिलं अनुमति बियातःगु कलेजय् ब्वनावःपिं सकलें विशेषज्ञ चिकित्सकतय्त अनुमति बीगु यानाच्वंगु दु । अथेहे नेपाःया काउन्सिलपाखें मान्यता कयातःगु कलेजय् न्ह्यागु विषयय् कयाः ब्वनावःपिं जूसां उमित नं भारतय् नं अनुमति बीमाःगु खँ नेपाल मेडिकल काउन्सिलं धाःगु दु ।
नेपाल मेडिकल काउन्सिलया अध्यक्ष डा. धर्मकान्त बाँस्कोटां थन अध्ययन यानाः वंपिं चिकित्सकतय्त भारतय् नं मान्यता बीकेगु निंतिं इनाप यासें प्रधानमन्त्री केपी ओलीपाखें भारतीय प्रधानमन्त्रीय् प्रधानमन्त्रीयाथाय् खँ थ्यंकागु जानकारी बियादीगु दु । वंगु वैशाखय् भारतीय प्रधानमन्त्री नरेन्द्र मोदी नेपाः भ्रमणय् वःबलय् नं थ्व खँ ल्ह्वनागु वय्कलं कनादीगु दु ।
LEAVE YOUR COMMENTS