गाडी न्यायेत बैंकं त्यासा मबीगु तयारी

चालु आर्थिक दँया झिंछला दुने १२ खर्बया व्यापार घाटा

येँ – चालु आर्थिक दँया झिंछला दुने १२ खर्ब बराबरया व्यापार घाटा जूगु दु । थ्व झिंछला दुने मुक्कं १३ खर्ब ८७ अर्ब ६३ करोड तका दांया वैदेशिक व्यापार जूगु खःसा उकी १२ खर्ब ९९ अर्ब आयात जूगु खःसा ८७ अर्ब ८३ करोड निर्यात जूगु खः । वंगु आर्थिक दँया तुलनाय् चालु आर्थिक दँय् वैदेशिक व्यापार अप्वःगु दुसां व्यापार घाटा नं अप्वःगु दु ।

वंगु आर्थिक दँय् कुल ११ खर्ब ८० अर्ब ९६ करोडया वैदेशिक व्यापार जूगु खः । उकी मुक्कं ११ खर्ब ६ अर्बया आयात जूगु खःसा ७४ अर्ब ३२ करोडया निर्यात जूगु खः । चालु आर्थिक दँय् वंगु आर्थिक दँया व हे अवधिइ आयात निर्यात नितां अप्वः जूसां व्यापार हिस्सा धाःसा खास हे हिउपाः वःगु मदु ।

वंगु दँय् वैदेशिक व्यापारय् आयातया ब्व ९३.७ प्रतिशत दुगु खःसा निर्यात ६.३ प्रतिशत दुगु खः । दँय्दसं व्यापार घाटा अप्वया वनाच्वंगुलिं सरकारं व्यापार घाटा म्हो यायेगु निंतिं ‘व्यापार घाटा न्यूनीकरण सम्बन्धि राष्ट्रिय कार्ययोजना’ लागू याःगु दु । थ्व कार्ययोजना कथं अत्यावश्यक वस्तु बाहेक मेगु आयात म्हो यानाः वैदेशिक व्यापार सनतुलन यायेगु कुतः जुइ ।

थ्व झ्वलय् सरकारं सवारी साधनया लिसें मेमेगु विलासी वस्तुया आयात कडा याइगु जूगु दु । अथेहे देय् दुने उत्पादन जुइगु व म्हो महत्वया वस्तुया आयात दिकेगु सरकारया तयारी दु । थ्व कार्यायोजना कथं विद्युतीय बाहेक मेगु इन्धनं चले जुइगु गाडीयात बैंकं त्यासा मबीगु जूगु दु । थ्व कार्ययोजना कथं सवारी साधनय् ट्रष्ट रिसिट (टिआर)य् त्यासा काये मदइगु व्यवस्था यायेत्यंगु खः ।

थौंकन्हय् बैंकतय्सं सवारी साधन न्यायेबलय् ५०प्रतिशत तक त्यासा बीगु याना वयाच्वंगु दु । थुकिं यानाः देशय् क्षमता स्वयां अप्वः गाडी दुहां वयाच्वंगु दुसा थुकिया लिच्वः इन्धन आयात नं लानाच्वंगु दु । गुकिं व्यापार घाटा झन अप्वयेकाच्वंगु दु ।