चीन मौन, भारतपाखें सुझाव : नेपालय् चीनया कुतः असफल जूगु भारतया विश्लेषण

येँ (नेपालभाषा टाइम्स) – देशय् ब्वलंगु लिपांगु राजनीतिक घटनाक्रमयात कयाः चीनपाखें आः तक छुं कथंया अभिव्यक्ति मबिउगु खँय् थन आश्चर्य प्वंका हःगु दु । निम्ह अध्यक्षतय् विवादं यानाः तज्यायेत्यंगु नेपाल कम्युनिष्ट पार्टीयात बचे यायेगु लागिं चीनं थःगु सक्रियता क्यनेगु याना वयाच्वंगु खः ।

नेपाल कम्युनिष्ट पार्टी (नेकपा) या निम्ह अध्यक्ष दथुइ विवाद ब्वलंगु इलय् नेपाःया निंतिं चिनियाँ राजदूत होउ याङछी सक्रिय जूगु खःसा थुपालय् धाःसा वय्कः नं सुम्क च्वंगुलिं थन थीथी कथंया आशंका नं ब्वलंगु दु । थ्व इलय् चिनियाँ राजदूत याङछीं मौन च्वनादीगु खँय् नेपाःया निंतिं भारतया पुलांम्ह राजदूत रेन्जित रें धाःसा भारतीय पत्रिका ‘दि इकोनोमिक टाइम्स’य् छपु च्वसु च्वयाः नेकपाया निगू गुट दथुइ ब्वलंगु विवाद ज्यंकेगु निंतिं चीनं याःगु सहजीकरण असफल जूगु टिप्पणी यानादीगु दु ।

रें च्वयादीगु दु, ‘गबलय् तक चीनं ओलीयात समर्थन यानाच्वंगु खः, उबलय् तक फुक्कं पाय्छि जुयाच्वंगु खः, तर गबलय् प्रम ओलीं चीनया चिउताः मदुसां नं नेकपा एकीकृत जुइ धइगु तायेकल, ओलीं थःगु रणनीति हीकल ।’ रें थःगु च्वसुइ नेपालय् ब्वलनाच्वंगु भारत विरोधी राष्ट्रवादयात ओलीं तच्वयेकूगु व आः उकियात हीकाः भारतलिसे सम्बन्ध सुधार यायेत्यंगु दु धासें ओलीया थ्व सुधारयात भारतं सकारात्मक रुपं कायेमाःगु खँ न्ह्यथनादीगु दु ।

नेपाःया घटनाक्रमयात कयाः चिनियाँ सरकारी माध्यमं छुं कथंया प्रतिक्रिया बियाच्वंगु मदुसां नं नेपाःया घटनाक्रमयात कयाः चीन सरकारया आधिकारिक ख्वाःपौ ‘ग्लोबल टाइम्स’य् नेपाःविज्ञं छपु च्वसु च्वयाः नेपाःया राजनीति आः अस्थिरता व अनिश्चयया लँपुइ वनेत्यंगु टिप्पणी याःगु दु । छेङदु इन्स्टिच्युट अफ वर्ल्ड अफेयर्सया अध्यक्ष लोङ छिङचुनं च्वःगु उगु च्वसुइ धयातःगु दु, ‘ओली व दाहाल नेतृत्वया पुचः निगू कम्युनिष्ट पार्टीइ विभाजन जुइफु, थ्व नेपाःया राजनीतिक भविष्य व कम्युनिष्ट पार्टीया निंतिं प्रतिकूल जुइफु ।’

उगु च्वइसु छिङचुनं न्ह्यथनातःगु दु, ‘संसद भंग यायेगु निर्णयं देशय् तःधंगु अशान्ति ब्वलंकेफु लिसें वइगु चुनावय् गुगुं नं दलं बहुमत हयेफइ मखु, अले नेपालय् न्हापा थें तुं गठबन्धनया सरकार नीस्वनेफु, गुकिया कारणं यानाः सरकार हिलेगु ज्या जुयाच्वनी ।’

च्वसुइ छिङचुनं चीन नेपालय् छुं गुगुं पार्टीया सरकार वयेमाः धइगु चाहना मदु धासें तर नेपालय् स्थीर सरकारया पक्षय् दुगु खँ नं न्ह्यथनातःगु दु । च्वसुइ नेपालय् स्थीर सरकार दत धाःसा नेपाः व चीनया दथुइ सम्बन्ध अझ क्वातुइ धासें चीनं नेपालय् स्थीर सरकार दयेमा, बारम्बार परिवर्तन मजुइमा, फुकस्यां लबः कायेमा धइगु चाहे जुयाच्वंगु खँ नं न्ह्यथनातःगु दु । च्वसुइ नेपाःया गुगुं नं दलयात चीनं गुगुं कथंया दबाब मबिउगु, ग्वाहालि मयाःगु व गुगुं नं खँय् बाध्य मयाःगु दावी नं यानातःगु दु ।

सम्बन्धित बुखँ

LEAVE YOUR COMMENTS