खुला मञ्चय् पार्किङया विरोध

येँ (नेपालभाषा टाइम्स)- येँ महानगरपालिकां खुला मञ्चय् अण्डर ग्राउण्ड पार्किङ दयेकेगु धकाः याःगु निर्णयया विरोध सुरु जूगु दु । मुक्त टुँडिखेल अभियानया अभियन्तातय्सं म्हिगः अज्याःगु पार्किङया विरोध यासें २८ नम्बर वडाया वडाध्यक्ष भाइराम खड्गीयात निवेदन बिउगु दु ।

येँ महानगरपालिकां खुलामञ्चय् ट्रिपल बेसमेन्ट पार्कङ दयेकेगु योजना हःगु खःसा उकिया विरोध यासें अभियानपाखें खुला मञ्चयात न्हापा थें खुल्ला याना तयेमाः धासें अन गुगुं नं हालतय् पार्किङ दयेके मबीत निवेदन बिउगु खः ।

खुल्ला मञ्च अतिक्रमण यायेगु क्रम अप्वया वनेवं खुल्ला क्षेत्रया महत्वयात कयाः जनचेतना थनेगु कथं मुक्त टुँडिखेल नामं अभियान न्ह्याका वयाच्वंगु खः । खुल्ला मञ्च येँ देय्या लःया प्राकृतिक रिचार्ज याइगु लागा जूगु कारणं उकियात स्यंकाः प्राकृतिक रिचार्ज क्षेत्रया विनास याये मजिउगु खँ नं अभियानं धाःगु दु । अभियानं अन पार्किङ दयेकेगु पलेसा येँ मनपां खाली याकूगु बेसमेन्ट, धरहरा क्षेत्रय् दयेकाच्वंगु पार्किङ क्षेत्रयात हे व्यवस्थित यायेत नं सुझाव बिउगु दु ।