ने. सं. ११४४ कछलागा पञ्चमी -

पञ्चेश्वरया डिपीआर अझं लिबाइगु

येँ – सरकारं पञ्चेश्वर बहुउद्देश्यीय आयोजनाया विस्तृत परियोजना प्रतिवेदन –डिपीआर) तयार यायेत गठन याःगु विज्ञ समूहया म्यान वइगु सेप्टेम्बर महिना तकया निंतिं थप यानाबिउगु दु । थुकिया लिसें निगू दशक न्ह्यव निसें चर्चा वयाः नं थाती लानाच्वंगु नेपाःया तःधंगु जलविद्युत आयोजना मध्ये छगू लाःगु थ्व योजनाया ज्या आः सुरु जूसां प्रारम्भिक ज्या हे ताःहाकः जूवंगु दु ।

विज्ञ समूहय् दुथ्याःपिं विज्ञपिंसं आः याकनं हे बैठक च्वनाः मिले मजूगु प्राविधिक समस्या ज्यंकेगु खँ धाःगु दु । विज्ञ समूहया बैठक वंगु गुला न्ह्यव निसें च्वने फयाच्वंगु मदुनि । तत्कालिन प्रधानमन्त्री शेरबहादुर देउवा भारत भ्रमण वंगु इलय् निगुलिं देया प्रधानमन्त्रीतय् दथुइ पञ्चेश्वर आयोजना न्ह्यःने यंकेगु खँय् सहमति जूगु खः ।

थ्व सहमति लिपा नेपालय् छक्वः व भारतय् छक्वः यानाः निक्वः जक विज्ञतय् बैठक च्वनेधुंकूगु दु । वंगु सेप्टेम्बरय् भारतय् च्वंगु बैठकय् गुगुं नं इलय् थ्व परियोजनापाखें म्होतिं नं ९२५ मेगावाट मत उत्पादन यायेगु विषयय् सहमति याःगु खः । आः थ्व बाहेक मेमेगु प्राविधिक विषयय् सहलह यायेगु खँ विज्ञ समूहया दुजः व उर्जा मन्त्रालयया प्रवक्ता दिनेश घिमिरें बिबिसीयात कनादीगु दु ।

वय्कलं धयादीगु दु, ‘शुरुइ न्यासःगू ति प्राविधिक विषय दुगु खः, आः सछिगूति जक ल्यं दनि । व नं आः च्वनेगु बैठकं ज्यंकेगु जुइ । समस्या प्राविधिक विषयय् मखु, सैद्धान्तिक विषयय् दु ।’लिपांगु बैठकय् भारतीय पक्षं शारद तटया लः उपयोग याये दयेमाःगु माग तया वयाच्वंगु खः । तर नेपाली पक्ष थुकी सहमत मजुइवं डिपीआर दयेके मफयाच्वंगु खँ घिमिरें धयादीगु ।

वय्कलं धयादीगु दु, ‘भारतं यक्व लः छ्यलेगु खःसा उकिया पलेसा नेपाःयात नं उलि हे मात्राय् मत बीमाः धया वयाच्वनागु दु । उमिसं थ्व बारे थप अध्ययन यायेमानिगु खँ धाःगु दु ।’ लःया विषयय् भारतं लिखित प्रतिबद्धताय् हे वयेमाः धकाः बः बियाच्वंगुलिं नं गुलिसिनं थुकी शंकाया मिखां स्वयाच्वंगु दु । पुलांम्ह ऊर्जा सचिव शीतलबाबु रेग्मीं धयादी, ‘नेपालय् छ्यलेधुंकाः व लः आखिरय् भारतय् हे वनीगु खः ।

भारतं लखय् लिखित दस्तावे सम्झौताय् बः बियाः पञ्चेश्वरया ज्या लिबाकाच्वंगु दु ।’नेपाःया न्ह्याम्ह प्रधानमन्त्रीं भारतया भ्रमण याइबलय् पञ्चेश्वरयात प्राथमिकता बिउगु खनेदुसां उकिं तात्विक लिच्वः आःतक लाके मफुनिगु खँ धासें विज्ञतय्सं आः नं विस्तृत अअध्ययन प्रतिवेदन तयार यायेफइगु खँय् शंका प्वंकाच्वंगु दु ।