विद्या भण्डारी निक्वःगु कार्यकालया निंतिं राष्ट्रपति निर्वाचित

येँ – वाम गठबन्धनया मंकाः उम्मेदवार विद्यादेवी भण्डारी नेपाःया न्हूम्ह राष्ट्रपति कथं निर्वाचित जुयादीगु दु । संघीय गणतन्त्र नेपाःया राष्ट्राध्यक्षया रुपय् भण्डारीया थ्व निक्वःगु कार्यकाल खः । राष्ट्रपति भण्डारीं मुक्कं ३९ हजार २७५ मतभार कयादीगु खः ।
संघीय संसदय् राष्ट्रपति भण्डारीयात २४५ मत वःगु खः । संघीय संसदया सदस्यया छगू मतया भार ७९ कायम यानातःकथं वय्कःयात राष्ट्रिय सभा व प्रतिनिधिसभापाखें १९ हजार ३५५ मतभार चूलाःगु खः । वय्कःया प्रतिस्पर्धी कुमारी लक्ष्मी राइयात संघीय संसदय् ७८ मत वःगु खः । थ्व धयागु ६ हजार १६२ मतभार खः ।

अथेहे प्रदेश सभापाखे राष्ट्रपति भण्डारीयात ४१५ मत वःगु खः । प्रदेशसभाय् छगू मतया भार ४८ कायम यानातःगु दु । थ्व ल्याखं भण्डारीयात प्रदेशसभापाखें १९ हजार ९२० मतभार चूलाःगु खः । संघीय संसद व प्रदेशसभाया मतभार स्वानाः राष्ट्रपदया निंतिं भण्डारीयात मुक्कं ३९ हजार २७५ मत प्राप्त जूगु खः । थ्व मत वय्कःया प्रतिस्पर्धी कुमारी राईया स्वयां २७ हजार ४४५ मत अप्वः खः । राईयात प्रदेशसभापाखे ११५ मत वःगु खः, गुकिया मतभार ५ हजार ५६८ जूवइ । मुक्कं यानाः राई ११ हजार ७३० मतभार चूलाःगु दु ।
राष्ट्रपति निर्वाचनया निंतिं मुक्कं ५२ हजार ५०१ मतभार दुगु खः । थौं निर्वाचनय् संघीय संसदपाखे स्वंगू मत बदर जूगु खःसा प्रदेस सभापाखें न्यागू मत बदर जूगु खः ।

संघीय संसदपाखें बाबुराम भट्टराई, प्रेम सुवाल, जितेन्द्र नारायण देव, रमेश यादव व रेशम चौधरी मतदानय् अनुपस्थित जूगु खः । चौधरी जेलय् लानाच्वंगुलिं अनुपस्थित जूम्ह खः । भट्टराईया नयाँ शक्ति व नेपाल मजदुर किसान पार्टीं मतदान मयायेगु खँ धाःगु खः । अथेहे राष्ट्रिय सभाया मनोनित स्वम्ह सांसदत युवराज खतिवडा, , रामनारायण बिडारी व विमला राई पौडेलं मतदान यायेमखन ।
प्रदेश सभापाखे झिंस्वम्ह सांसद अनुपस्थित जूगु खः । विवेकशिल पार्टी नं राष्ट्रपतिया मतदानय् ब्वति मकायेगु खँ धाःगु खः ।
राष्ट्रपति भण्डारीं न्हूगु कार्यकालया निंतिं कन्हय् शपथग्रहण यानादी ।

नेपालभाषा टाइम्स

च्वमिया मेमेगु

• झीगु सःया निसःब्व थ्यन, निम्ह संचारकःमि सम्मानित
• बालेनया जय जयकार सुनियोजित धइगु पुष्टि
• यँयाःयात झःझः धायेकीम्ह पुलुकिसि
• कन्हय् महाकविया किपा बग्गीइ तयाः चाःहीकीगु
• राजदूतया खँय् नेकां–एमाले ल्वापु