४० माइक्रोनं क्वय्या प्लाष्टिक प्रतिबन्ध

येँ (नेपालभाषा टाइम्स)÷ सरकारं ४० माइक्रोन स्वयां क्वय्या गणस्तरया प्लाष्टिकजन्य सामग्रीइ प्रतिबन्ध तःगु दु । संघीय मामिला तथा सामान्य प्रशासन मन्त्रालयया सचिव डा. कृष्णहरि पुष्करं बिहिवाः छगू विज्ञप्ति पितबिसें ४० माइक्रोन स्वयां क्वय्या गुणस्तरया प्लाष्टिकजन्य सामग्री प्रतिबन्ध तयागु खँ धाःगु खः । विज्ञप्तिइ प्लाष्टिकया म्हिचा व प्लाष्टिकया मेमेगु सामग्री छ्यलेबलय् ४० माइक्रोन स्वयां च्वय्या सामग्री जक छ्यलेत धयातःगु दु ।

विज्ञप्तिइ संघ, प्रदेश व स्थानीय तहया सरकारयात ४० माइक्रोन स्वयां क्वयया प्लाष्टिकजन्य सामग्री प्रतिबन्ध तयेगु सरकारया अभियानयात ग्वाहालि यायेत नं धयातःगु दु ।
फोहरमैल व्यवस्थापन सम्बन्धी आधाररेखा सर्वेक्षण २०२२ कथं नेपालय् छेँखां पिहां वइगु फोहर मध्ये प्लाष्टिकजन्य फोहर १२ प्रतिशत, संस्थागत क्षेत्रय् २१ प्रतिशत व व्यापारिक क्षेत्रं २२ प्रतिशत प्लाष्टिकया फोहर पिहां वयाच्वंगु दु ।

विज्ञप्तिइ प्लाष्टिकजन्य फोहरया कारणं हरितगृह ग्यास उत्सर्जन जुइगु, जलचर जीवजन्तु सीगु कारण जुयाच्वंगु, प्लाष्टिक च्याकीगुलिं यानाः वायुमण्डलय् डाइअक्सिन, प्यूरान व विषालु ग्यास उत्सर्जित जुयाच्वंगु, प्लाष्टिकया फोहर ध्वग्गिना मवनीगु जूगुलिं लःया मुहान हे सुनावनीगु, न्ह्याथासं फोहर खनेदइगु लिसें वातावरणी स्वास्थय व मानव स्वास्थ्य गम्भीर लिच्वः लाकीगु खँ नं धयातःगु दु ।