निर्वाचन आयोगया आलोचना

येँ / निर्वाचन आयोगया गतिविधियात कयाः थीथी कथंया न्ह्यसः ब्वलंगु दु । नेपाल कम्युनिष्ट पार्टी (नेकपा) या विवाद निरुपणय् निर्वाचन आयोगं लिबाकाच्वंगु धासें आलोचना जुयाच्वंगु खःसा आयोगं धाःसा आः तक नं निगू पार्टीया विवादयात कयाः निर्णय बी फयाच्वंगु मदुनि ।
नेकपाया प्रचण्ड–माधव पक्षं थःपिं आधिकारिीक पार्टी जूगु दावी यासें नीन्हु न्ह्यः आयोगय् निवेदन बिउगु खःसा उकियात कयाः आः तक नं निर्वाचन आयोगं निर्णय मबिउगुलिं यानाः आयोगयात कयाः न्ह्यसः ब्वलंगु खः ।

प्रचण्ड–माधव पुचलं वंगु माघ २० गते राजनीतिक दल सम्बन्धी ऐनया दफा ४४ कथं आधिकारिकता दावी याःगु खः । तर आयोगं आः तक नं निर्णय याये फयाच्वंगु मदु । आयोगं अध्ययन जुयाच्वंगु धासें गबलय् तक निष्कर्ष वइ धइगु न्ह्यसःया लिसः नं बियाच्वंगु मदुनि । आयोगं इलय् निर्णय मयाःगुलिं अनेक न्ह्यसः ब्वलंगु दु ।

दल विवाद सम्बन्धी फाइल थौंकन्हय् राजनीतिक दल सम्बन्धी महाशाखाय् थ्यनाच्वंगु दु । महाशाखाया कथं नकतिनि प्रधानमन्त्रीपाखें नियुक्त जुयादीम्ह सचिव सुरेश अधिकारी खःसा वय्कलं नं विवादयात कयाः अध्ययन जुयाच्वंगु खँ धायेगु यानाच्वंगु दु । थ्वहे झ्वलय् आयोगया आयुक्त रामप्रसाद भण्डारीं छन्हु निन्हुया दुने हे निर्णय यायेत निर्देशन बिउगु खँ सीदुगु दु ।

आयोगं सर्वोच्च अदालतया फैसला छु जुइ धइगु अलमलय् लानाच्वंगुलिं नं निर्णय यायेत थाकुयाच्वंगु खँ धाःगु दु । निर्वाचन आयोगं सर्वोच्चया निर्णय लिपा जक निर्णय याये फइगु खँ सूत्रं धाःगु दु ।

तर निर्वाचन आयोगं नेकपाया दल विवाद बारे निर्णय मयाःसां नं निर्वाचन यायेगु निंतिं थीथी कथंया ज्या धाःसा न्ह्याकाच्वंगु खँ सीदुगु दु । आयोगं मतदाता नामावली, आचारसंहिता, निर्वाचनस्थल, निर्वाचन केन्द्र, दल दर्ताया सुचं लगायत विषयसं आन्तरिक तयारी यायेधुंकूगु दुसा निर्वाचन यायेगु निंतिं राजनीतिक दलत लिसे सहलह यायेगु ज्या नं न्ह्याकाच्वंगु दु ।

निर्वाचन आयोगं दलत लिसे सहलह याःसां नं नेकपाया प्रचण्ड–नेपाल पक्षं धाःसा आः निर्वाचनया निंतिं सहलह यायेगु आवश्यकता मदु धासें सहलह ज्याझ्वलय् ब्वति काःसां नं निर्वाचनया बारे सहलह यायेमाःगु आवश्यकता मदु धायेगु यानाच्वंगु दु ।

तर निर्वाचन आयोगया पुलांपिं आयुक्तपिंसं धाःसा नेकपाया विवाद मज्यंकुसें दल दर्ताया आह्वान यायेगु ज्या गलत जूगु खँ धायेगु यानाच्वंगु दु । नेकपाया विवाद बारे निर्वाचन आयोग अनिर्णयया बन्धक जुयाच्वंगु धासें पुलाम्ह आयुक्त दोलखबहादुर गुरुङं नेकपाया विवाद ज्यंकाः जक दल दर्ता सम्बन्धी निर्णय यायेमाःगु खँ धयादीगु दु ।

सम्बन्धित बुखँ

LEAVE YOUR COMMENTS