सिंहदरवारया पश्चिम ब्वःया पुनःनिर्माण याइगु

येँ – देय्या प्रमुख प्रशासनिक केन्द्र सिंहदरवारया पश्चिमपाखे च्वंगु ब्व पुनःनिर्माण याइगु जूगु दु । तःभुखाचं क्षति जूगु सिंहदरवारया भवनया पश्चिमपाखे च्वंगु ब्व थुना दयेकेगु वा प्रबलीकरण जक यायेगु धइगु बारे स्पष्ट मजुयाच्वंगु अवस्थाय् आः वयाः उकिया पुनःनिर्माण यायेत्यंगु खः ।

राष्ट्रिय पुनःनिर्माण प्राधिकरणया प्रमुख कार्यकारी अधिकृत सुशील ज्ञवालीं पुरातात्विक व ऐतिहासिक महत्वया सम्पदायात ल्यंकाः सिंहदरवारया पश्चिमपाखेया ब्व पुनःनिर्माण यायेगु प्रतिवद्धता प्वंकादीगु खः । यद्यपि सिंहदरवारया पश्चिम ब्वयात छु यायेगु धइगु बारे अझ नं अध्ययन जारी जुयाच्वंगु प्राधिकरणं न्ह्यथंगु दु ।

पुरातात्विक महत्वया सम्पदा ल्यंकाः पुनःनिर्माण यायेगु खँयात प्राधिकरणं प्राथमिकता बियाः ज्या यायेगु सिंहदरवार पश्चिम ब्वया निरीक्षण लिपा ज्ञवालीं धयादिल ।

सिंहदरवारया पश्चिम ब्वया अध्ययन यायेगु जिम्मेवारी कयातःगु परामर्शदाता कम्पनीयात फक्व याकनं अध्ययन प्रतिवेदन तयार यायेत निर्देशन बियागु जानकारी बियादिसें प्रतिवेदन वयेवं पुनःनिर्माणया ज्या नं न्ह्याका छ्वयेगु प्राधिकरणया योजना दुगु धयादिल ।