चोभारया सुख्खा बन्दरगाह विरुद्ध विश्व बैंकय् उजुरी

येँ – चोभारय् दयेकाच्वंगु सुख्खा बन्दरगाहपाखें प्रभावित समुदायया प्रतिनिधिपिंसं परियोजनाया वित्तिय दाता विश्व बैंकय् उजुरी बिउगु दु ।

अनया प्रभावित स्थानीयतय्सं नीस्वनातःगु चोभार संरक्षण समितिया प्रतिनिधितय्सं शनिवाः विश्व बैंकया स्वतन्त्र संयन्त्र इन्सपेक्सन प्यानलय् उजुरी बिउगु खः । उजुरीइ प्रभावित समुदायया स्वतन्त्र, पूर्व व सुचित सहमति कायम यायेत परियोजना असफल जूगु द्वपं बियातःगु दु । नापं विश्व बैंकयात तुरुन्त सुख्खा बन्दरगाहाया बजेट निकासा व फुक्कं निर्माण गतिविधि दिकेत व वैकल्पिक योजना मालेत इनाप नं याःगु दु ।

बन्दरगाह निर्माणया झ्वलय् विश्व बैंकया सामाजिक व वातावरणीय संंरक्षण नीति, नेपाःया कानून व अन्तर्राष्ट्रिय श्रम संगठन (आईअलओ)या आदिवासी जनजाति सम्बन्धी महासन्धि १६९, संयुक्त राष्ट्रसंघया घोषणापत्र व अन्तर्रष्ट्रिय कानून उल्लंघन जूगु नं समितिं न्ह्यथंगु दु ।

पीडित स्थानीयतय्सं विश्व बैंकयात उपयुक्त पलाः ल्ह्वनेत व इन्सपेक्सन प्यानलयात बैंकया नीति उल्लंघन याःगु बारे अनुसन्धान यायेत नं इनाप याःगु दु ।

२०७६ माघय् नेपाःया प्रधानमन्त्री केपी शर्मा ओलीं शिलान्यास यानादीगु उगु बन्दरगाहयात कयाः स्थानीयतय्सं उकीया विरोध यानावयाच्वंगु दु ।