
ख्वप – नांजाःगु न्यातँपौ देगःया बुसादँ हनेगु झ्वलय् थुगुसी इतिहासय् हे छगू न्हूगु रेकर्ड कायम जूगु दु । दँय्दसं असार सुदिंकुन्हु न्यायेकीगु बुसादँय् देगःया दकलय् च्वय्या तँय् ब्वयेकेमाःगु पताः (ध्वाँय्) थुगुसी न्हापांगु तँय् ब्वयेकाः ज्या क्वचायेकूगु खः ।
देगःया बुसादँ हनेत माक्वः दां मदयेवं ख्वपया प्रजापति, कुम्हाः व अवालतय्सं ज्या मयायेवं ख्वप नगरपालिकां छुं ठेकेदारतय्त भाला बियाः ज्या क्वचायेकूगु धासें थुकथं अमार्यादित ज्या जूवंगु ज्या याइपिं मनूतय्सं धाःगु दु ।
ख्वपया कुम्हाः अवालतय्सं थ्व ज्या न्हापा स्वसःदँ तक याना वयाच्वंगु खः । वय्कःपिंत समायोजन यानाः धकाः झिंन्याद्वःनिसे नीद्वः तका दां उगु ज्याया लागिं बन्दोबस्त यायेमाःगु माग याःगु खः । देगःया पल्लिइ च्वंगु घाँय् दक्वं पुइगु थेंज्याःगु तसकं जोखिम ज्या यानाः दुगु स्यानाः भ्वय् नयेमाःगु थ्व ज्याया लागिं नीद्वः स्वयां अप्वः खर्च जुइगु यानाच्वंगु खः ।
तर ख्वप नगरपालिकां झिंन्यासः–निद्वः तका जक बीगु यानाच्वंगुलिं अवाल प्रजापतितय्सं थुगुसी न्हापांखुसी ज्या हे बहिष्कार याःगु खः । ज्या याइपिं न्यातपौया च्वथ्यंक गयाः वनेगु आँट मयायेवं छुं मनू न्हापांगु पलिइ तक जक वनाः अन ध्वाँय् तियाथकूगु खः ।
LEAVE YOUR COMMENTS