छायादेवी अन्तिम फैसलापाखे
येँ (नेपालभाषा टाइम्स)- ताः ई न्ह्यवंनिसें चर्चाय् वयाच्वंगु थँबहीया छायादेवी कम्प्लेक्सया मुद्दाय् सर्वोच्च अदालतं हानं मेगु निगू डकुमेन्ट मागे याःगु दु । प्यन्हुजालय् जूगु थ्व सम्बन्धी बहसय् अन्तिम आदेश वइ धकाः आशा याःगु खःसां न्यायाधीशतय्सं मेगु निगू डकुमेन्ट माग याःगु कारणं थुकिया फैसला छुं भचा लिज्याःगु दु ।
उकुन्हु अदालतं हाल विवादय् वःगु कित्ता नं. १६७ व कित्ता नं. १०४० या सकली ब्लु प्रिन्ट पेश या धकाः माग याःगु खः । अथे हे थ्व निगू कित्ता जग्गा नेपाल सरकारय् दर्ता कायम जूगु सक्कली भ्वं पेश या धकाः नं माग याःगु दु । आः निगू भ्वं नं पेश यानाः बहस न्ह्याकीबलय् मुद्दा छुं ई ताःहाकः जू वनीगु संकेत खने दया वःगु खँ धाःगु दु ।
थ्व कित्ता नं. १६७ व १०४० धइगु थौंकन्हय् छायादेवी कम्प्लेक्सया छेँ दना तःगु जग्गा खः । कित्ता नं. १६७ य् १२ रोपनी १३ आना ३ पैसा २ दाम जग्गा दुसा कित्ता नंं. १०४० य् ९ आना २ पैसा ३ दाम जग्गा दु । थ्व निगुलिं कित्ता थँबही अर्थात विक्रमशील महाविहारया जग्गा खः धकाः प्रमाणित जुइधुंकूगु दु । वि.सं. २०४४ सालय् निगुलिं जग्गा नेपाल सरकारया जग्गा कथं दर्ता कायम जुइधुंकूगु दु । सर्वोच्च अदालतय् थुकिया फोटो कपी पेश याना तयेधुंकूगु दु । उकुन्हु थ्वहे भ्वंया सक्कल कपी माग याःगु खः ।
अथे हे अदालतं कित्ता नं. १६७ या सक्कल ब्लु प्रिन्ट नं माग याःगु दु । अदालतं थ्व स्वयां नं सक्कल ब्लु प्रिन्ट माग याःगु खः । तर मालपोतं उकिया सक्कल अदालतय् पेश मयाः । उकिं हानं माग याःगु खः ।
सवोच्चय् छायादेवी कम्प्लेक्सया जग्गा खाली याकेमाः धइगु माग ज्वनाः मुद्दा तयादीपिं मध्ये छम्ह अभियन्ता भागवत नरसिंह प्रधानं कनादी कथं अदालतय् थुकिया फोटो कपी न्हापा हे पेश याना तयेधुंकूगु दु । तर अदालतं अन्तिम फैसला याये न्ह्यः उकिया सक्कल नं छक्वः स्वये माली धइगु महसुस यासें आः सक्कल माग याःगु खः ।
अभियन्ता प्रधानं ‘नेपालभाषा टाइम्स’ यात कनादी कथं थम्हं फोटो कपी न्हापा हे पेश यायेधुनागु जूगुलिं आः सक्कल हे वल धाःसा मुद्दा अझ हे बल्लाइगु खँ कनादिल । अदालतं थम्हं पेश यानातयागु फोटो कपीयात खण्डन याये मफुगु जूगुलिं आः सक्कली वइबलय् नं खण्डन धाःसा याये मफइगु खँ नं प्रधानं कनादिल ।
छायाँदेवी कम्प्लेक्स धइगु नांजाःम्ह बैंकर पृथ्वीबहादुर पाँडें थः मां छायादेवी पाण्डेया नामं दयेकूगु छगू बिजिनेस कम्प्लेक्स खः । पाँडें कम्प्लेक्स दनेत न्याना काःगु थ्व जग्गा न्हापा पलेस्वां पुखू जुयाच्वंगु व पुखू ल्हानाः छेँ दंगु खँ पिहां वयेवं सम्पदा अभियक्त भागवत प्रधाना लिसें अधिवक्ता दीपक विक्रम मिश्र व रामहरि श्रेष्ठं वि.सं. २०७१ सालय् सर्वोच्चय् रिट दर्ता याःगु खः । अनंनिसें थ्व रिट आः तक न्ह्यानाच्वंगु दनि । रिट तःपिंसं पुखू स्यंकाः दनातःगु छायादेवी कम्प्लेक्सया छेँ थुनाः अन पुखू हे कायम यायेमाः धकाः जिकिर यानाच्वंगु दु । गुथि संस्थानं नं उगु जग्गा स्थानीय गुथियागु हे खः धकाः लिखत छ्वयेधुंकूगु दु ।
LEAVE YOUR COMMENTS