बुंगद्यःया जात्रा जुइगु निश्चित !

येँ (नेपालभाषा टाइम्स) – वइगु ७ गते बुंगद्यः रथय् बिज्याकीगु निश्चित जूगु खँ ज्यापू समाज यलया अध्यक्ष चन्द्र महर्जनं धयादीगु दु। ‘नेपालभाषा टाइम्स’ लिसे खँ ल्हायेगु झ्वलय् वय्कलं थ्व खँ धयादीगु खः । म्हीग बहनी यल जिल्लाया सीडिओया अध्यक्षताय् च्वंगु बैठकं हे उगु निर्णय याःगु जानकारी नं वय्कलं बियादीगु दु ।

बुंगद्यःया जोतिषतय्सं म्हिगः सुथय् ७ बजे द्यःयात रथय् बिज्याकेगु साइत बियातःगु खःसा म्हीग आकाझाकां गुथि संस्थान यलं जात्रा दिकेत पौ बीवं जात्राया बारे अन्योल ब्वलंगु खः । थ्व लिपा म्हीग बहनी हे हाकनं जात्रा सुचारु यायेगु निंतिं प्रमुख जिल्ला अधिकारया अध्यक्षताय् बैठक च्वंगु खः । उगु बैठकय् देय्या प्यंगुलिं सुरक्षा निकाय, गुथि संस्थान, सिडिओ कार्यालय, संघीय सांसद, प्रदेशसभाया सांसदपिं, ज्यापु समाज यलया पदाधिकारी व थीथी गुथिया प्रतिनिधिपिं दुथ्याःगु खः ।

बैठकं साउन ७ गते द्यःयात रथय् बिज्याकेगु व १० गते द्यः सालेगु लिसें वइगु २४ गते भोटो क्यनेगु क्वःछिउगु खः । समाजया अध्यक्ष महर्जनं रथ सालेबलय् खुइम्ह स्वयां अप्वः मतयेगु सहमति जूगु, जात्रा स्वःमवयेत इनाप यायेगु कथं सहलह जूगु खँ कनादीगु दु ।

वय्कःया कथं जात्राया झ्वलय् आपालं मनूत ममुनेमाः धकाः प्रहरी परिचालन यानाः थीथी नाकाय् नाकाबन्दी याइगु जुइ । अथेहे जात्राया झ्वलय्छ ज्वः निज्वः जक बाजं खलकं ब्वति काइगु कथं व्यवस्था जुइ । जात्राया झ्वलय् सुयातं नखत्याः मसःतेत इनाप यायेगु खँ नं वय्कलं धयादीगु दु। द्यः सालेगु निंतिं नं सामाजिक दूरी गुकथं कायम यायेगु धयागु बारे सहलह जुयाच्वंगु खँ वय्कलं धयादीगु दु ।

द्यः सालेत खुइम्ह मनू पर्याप्त जुइला धकाः न्यनागु न्ह्यसलय् वय्कलं पुच्वः निसें लगंख्यलय् तक कुहां जक वनेगु जुयाः द्यः सालेत समस्या मजुइगु खँ नं कनादिल । साउन ७ गते द्यः सालेगु क्वःछिउसां थ्व न्हि धाःसा द्यःयात रथय् बिज्याकेगु निंतिं बांलाःगु न्हि मजूगु खँ ज्योतिष कीर्तिमदन जोशीं धयादीगु दु। वय्कलं म्हीग जूगु समितिया बैठकय् थःपिंत मसःतूगु धासें साउन ७ गते धाःसा द्यः रथय् बिज्याकेगु निंतिं बांलाःगु न्हिं मखुगु खँ धयादीगु दु।

‘म्हिगः हे द्यः रथय् बिज्याकूगु खःसा द्यः गुबलय् सालेगु धकाः सीडिओलिसे नं सहलह यानाः निष्कर्ष पिकायेफइगु खः’ धासें वय्कलं धयादिल, ‘तर द्यः रथय् बिज्याकेगु साइतय् रथय् बिमज्याकू, आः ७ गते रथय् बिज्याकेगु निर्णय गनं वल, १० गते द्यः सालेगु निर्णय गनं जुल धइगु जिमिसं मसिउ ।’

साउन महिनां द्यः जात्रा क्वचायेकेगु पाय्छि मजूगु धापू वय्कःया दु । वय्कःया कथं साउन महिनाय् बुंगद्यः यलय् हःगु गुला क्यनी । गुन्हु कुन्हु छेँय् लिहां वनेमजिउ धइगु नेवाःतय् चलन खः । उकथं हे गुलां नं द्यःयात बुंगय् बिज्याके मजिउ । थ्वयां लिपा भदौ महिनाय् मलमास लाइगु जूगुलिं उबलय् नं बुंगय् द्यः लित बिज्याके मज्यूगु खँ वय्कलं धयादिल ।

वय्कलं नैक्यालं लुइत, जावलाख्यलय् यंकेत नं साइत स्वयेमाःगु खँ कनादिसें थुकिया निंतिं थःपिंत जानकारी मबिउनिगु खँ वय्कलं धयादीगु दु ।