त्यंगः त्वाः खलःया दँमुँज्या

येँ – त्यंगः त्वाः खलःया दँमुँज्या वंगु शनिवाः थनया म्हय्पि अजिमाया द्यःथाय् छगू ज्याझ्वःया दथुइ सम्पन्न जुल ।त्वाः नायः धनबहादुर ‘तिमिला’या सभापतित्वय् न्ह्याःगु मुँज्याय् पाहांकथं येँमपा १७ वडाअध्यक्ष नवीन मानन्धर, येँमपा १८ वडाअध्यक्ष न्हुछेकाजी महर्जन, त्वाः थाकुलि तिर्थनारायण महर्जन, त्वाः कजि कृष्णनारायण महर्जन, गुरु धर्मरत्न महर्जन, त्यंगः त्वाः मिसा पुचःया अध्यक्ष नानीहिरा महर्जन, निवर्तमान अध्यक्ष कुलबहादुर महर्जनपिं झायादीगु खः।

नानीहिरा महर्जनं लसकुस यानादीगु ज्याझ्वलय् येँमपा १८ वडाअध्यक्ष महर्जनं झी नेवाः समाज दुने थःगु भाय् त्वःताः कतःया भाय् स्यनेगु गलत प्रवृत्तिं नेवाः भाय् ल्यनि मखु धासें कमसेकम छेँय् अनिवार्यकथं भाय् ल्हायेगु व ल्हाकेगु यायेमाःगु खय्ँ बः बियादिल । नापं संस्कृति संरक्षण यायेगु व द्यःछेँ दयेकेगु ज्याय् त्वाः खलःयात सदां ग्वाहालि दयाच्वनेगु बचं नं वय्कलं बियादिल ।

येँमपा १७ वडाअध्यक्ष मानन्धरं देय् व नेवाः समाज दुने खने दयाच्वंगु समसामयिक बिषय दुग्यंक कुलादिसें त्वाःया संस्कृति म्वाकेगु ज्याय् नापं त्यंगः त्वाःया द्यःछेँ दयेकेया निंतिं माःगु ग्वाहालि यायेगु बचं बियादिल ।धिमेगुरु धर्मरत्न महर्जनं नं थःगु नुगःखँ तयादीगु ज्याझ्वलय् पुष्प महर्जनं सुभाय् देछानादीगु खःसा त्वाःया थीथी ज्याय् ग्वाहालि यानादीपिंत खादां न्ययेकाः हनेगु ज्या नं जूगु खः ।

ज्याझ्वलय् सभापतिया थासं धनबहादुर ‘तिमिलां’ं त्वाः न्ह्याकेगु ज्याय् ल्याय्म्ह पुस्ताया भूमिका अग्रणी जुइ धासें थुकिया लागि स्यनेकने यायेगु ज्याय् ल्याय्म्हत छपलाः न्ह्यचिले माःगु व अले जक झी पुर्खां लःल्हाना थकूगु तजिलजि ल्यंका तये फइ खँय् बःबियादिल ।