नेवाः मिसा पत्रकारतय्त हना

येँ – नेवाः पत्रकार राष्ट्रिय दबू मिसा विभागया ग्वसाः व येँ महानगरपालिकाया ग्वाहालिइ सञ्चार ख्यलय् मिसातय्गु भूमिका विषयक ज्याझ्वलय् स्वम्ह मिसा पत्रकारतय्त हंगु दु । खुसिबुँस्थित नेपाः बैंक्वेटय् जूगु ज्याझ्वलय् ताःईलंनिसें सञ्चार ख्यलय् मदिक्क ज्या यानाच्वनादीपिं मञ्जु बज्राचार्य, पूर्णिमा शाक्य व अनिता गुरुङयात हंगु खः ।

नेवाः पत्रकार राष्ट्रिय दबूया उपाध्यक्ष व मिसा विभागया संयोजक रचना श्रेष्ठया संयोजनय् जूगु ज्याझ्वलय् येँ महानगरपालिकाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ, वरिष्ठ पत्रकार शुभेच्छा विन्दु, नेपाल पत्रकार महासंघया उपाध्यक्ष, मधेशी पत्रकार समाजया अध्यक्ष मोहन सिंह लिसें सम्मानित जूपिंसं थःथःगु बिचाः तयादीगु खः ।

ज्याझ्वलय् नेपाःया पत्रकारिता ख्यलय् मिसात मिजंत स्वयां न्यागू दशक लिउने लाःसां लिपांगु इलय् वयाः मिसा पत्रकारतय्गु सहभागिता सन्तोषजनक दुगु धाःगु खः । अथेखःसां मिसात मूलधारया सञ्चार गृहय् सम्पादन व नीति निर्माणया तहलय् थ्यंके आवश्यक दुगु खँ नं न्ह्यथंगु खः ।

११२ क्वःगु अन्तर्राष्ट्रिय नारी दिवस हनेगु झ्वलय् थुगु हनेज्या जूगु खः ।

सम्बन्धित बुखँ

LEAVE YOUR COMMENTS