अन्ततः पुर्पक्षया लागिं महरा जेल चलान

येँ – बलात्कारया द्वपनय् ज्वनातःम्ह पुलांम्ह सभामुख कृष्णबहादुर महरायात पुर्पक्षया निंतिं कुनेत आदेश बिउगु दु । म्हिगः थुनछेक बहस लिपा जिल्ला अदालत येँया न्यायाधीश सुदर्शनराज पाण्डेया इजलासं वय्कःयात कुनेगु आदेश बिउगु खः । महरायात थुगु मुद्दा क्वमचाःतले जेलय् तइगु खँ धाःगु दु । वय्कःयात डिल्लीबजार कारागारय् यंकूगु खः ।

महरायात अदालतं मुलुकी फौजदारी संहितया दफा ८० कथं जेल चलान यायेत आदेश बिउगु खः । दफा ८० बमोजिमया थुनुवा पुर्जी बीधुंकाः ठहर बमोजिम जुइ कथं जेल चलान यानागु खँ जिल्ला अदालतया स्रेस्तादार आनन्दप्रसाद श्रेष्ठं कनादीगु दु । संसद सचिवालयया छम्ह कर्मचारीयात बलात्कारया कुतः याःगु द्वपनय् प्रहरी महरायात हिरासतय् तयाः अनुसन्धान न्ह्याकूगु खः ।

महरा विरुद्ध जिल्ला सरकारी वकिल कार्यालयं बलात्कार उद्योगय् कारबाही यायेत अभियोग पौ दर्ता याःगु खः । मुलुकी अपराध संहिता २०७४ कथं बलात्कार उद्योगया द्वपनय् स्वदँनिसें न्यादँ तकया कैद सजाय जुइगु व्यवस्था दु । सार्वजनिक ओहोदाया दुरुपयोग यानाः अपराध याःगु धासें सरकारी वकिल कार्यालयं महरायात जुइगु सजाय अप्वयेकेमाःगु माग नं यानातःगु दु ।

म्हिगः अदालतय् पीडित मिसाया नं उपस्थिति दुगु खःसा वयात धाःसा अदालतं न्ववाके मबिउगु खँ धाःगु दु । पीडित धाःम्ह मिसां थीथी इलय् बयान हिलेगु याना वयाच्वंगु दु । उकथं हे उम्ह मिसां प्रहरीं थःत जबरजस्ती उजुरी दर्ता याकूगु द्वपं नं बीगु यानाच्वंगु दु ।