भाषा–धर्मय् गणकतय् यत्थे, लमजुङय् गणकयात ज्वन
येँ – थौंकन्हय् न्ह्यानाच्वंगु जनगणना कायेगु ज्याय् थाय्थासय् भाषा व धर्मया नां च्वयेगु ज्याय् गणकतय्सं थः यत्थे च्वया यंकेगु यानाच्वंगु लुइवं आदिवासी जनजाति–तय्सं आपत्ति प्वंकूगु दु ।
जनगणना काः वइपिं गणकतय्सं बौद्ध धर्म च्वयेमाःथाय् हिन्दू च्वया बीगु व भाषाया सवालय् नं छेँथुवालं छु धाःगु खः व मच्वसे थः यत्थे ‘नेपाली’ च्वयेगु यानाच्वंगु लूगु दु । गनं गनं मनूतय्सं धाःगु लिसः खुरुक्क मच्वसे वयात थःगु बिचाः न्ह्यःने तयाः गणकतय्सं वहस यानाच्वंगु नं लूगु खँ धाःगु दु ।
अथे हे यलय् जनगणना काःवःम्ह छम्ह गणकं ८४ गू न्ह्यः दुथाय् छुं भचा जक न्यनाः बाँकी छेँय् च्वनाः भरे यायेगु धकाः लिहां वंगु खँ सम्बन्धित मनूतय्सं धाःगु दु । पिनेया छुं छुं जिल्लाय् गणकतय्सं सिसा कलमं तथ्यांक च्वया यंकूगु खँ नं पिहां वःगु दु ।
गणकतय्गु थज्याःगु हे खँयात कयाः राष्ट्रिय तथ्यांक विभागया ध्याना–कर्षण यायेगु लागिं म्हिगः आदिवासी जनजाति महासंघ लगायत थीथी जातीय पुचःया प्रतिनिधितय्सं विभागया महानिर्देशक नेबिनलाल श्रेष्ठयात नापलाःगु दु ।
उगु इलय् जनजाति प्रतिनिधितय्सं थीथी थासय् जुयाच्वंगु अज्याःगु घटनाया धलः हे न्ह्यब्वसें उकियात पनेत इनाप यानादीगु खः । गणकतय्सं अज्याःगु बदमासी याना जुल धाःसा अप्रिय घटना समेत जुइफु धासें विभागं तुरुन्त हे थुकी थःगु ध्यान बीत नं माग याःगु खः ।
वय्कःपिनि खँ न्यनेधुंकाः विभाग महानिर्देशक श्रेष्ठं थुकिया बारे तुरुन्त हे सम्बोधन यायेगु खँ कनादीगु खः । थुकिया बारे आः विभागं छगू विज्ञप्ति हे जारी यानाः वा गणकतय् नामय् निर्देशन जारी यानाः जूसां अज्याःगु ज्या याके मबीत पहल यायेगु जुइ धकाः कनादीगु खँ नेवाः देय् दबूया नायः नरेश ताम्रकारं ‘नेपालभाषा टाइम्स’ यात कनादिल ।
म्हिगः विभागय् महानिर्देशक श्रेष्ठ नापलायेत जनजाति महासंघया नायः जगत बराम नापं नेवाः, मगर, गुरुङ, तामाङ, शेर्पा, थामी लगायतया जातीय खलःतय् प्रतिनिधित वंगु खः ।
लमजुङय् गणकयात ज्वन
छेँथुवाःतय्सं धाःगु विवरण मच्वसे मेगु विवरण च्वया यंकूगु खँयात कयाः म्हिगः लमजुङय् छम्ह गणकयात स्थानीय मनूतय्सं ज्वंगु दु । बीना थापा नांयाम्ह उम्ह गणकयात स्थानीय गुरुङ समुदायया मनूतय्सं ज्वनाः प्रहरीयाथाय् यंकूगु खः ।
उम्ह गणकं छम्ह स्थानीय मनूया तथ्यांक कायेगु झ्वलय् मनुखं थःगु धर्म बौद्ध खः धायेक धायेक हे हिन्दू धकाः च्वया बिउगु खँ धाःगु दु । सम्बन्धित मनुखं धायेक धायेक हे थः यत्थे मेगु तथ्य च्वयेवं वयात ज्वनाः प्रहरीयाथाय् यंकूगु खः ।
गलत तथ्यांक च्वल धकाः स्थानीय मनूतय्सं गणकयात हे ज्वनेवं विवाद ब्वलंगु खः । वयां लिपा अनयाम्ह सीडीओ व प्रहरी समेत वयाः गणकयात छु यायेगु धकाः सहलह जूगु खँ धाःगु दु ।
LEAVE YOUR COMMENTS