दक्व थासं व्यापक विरोध जुइवं नेकपा नेता वामदेव गौतमं येँया क्षेत्र नं ७पाखें उम्मेदवारी मबीगु जूगु दु । क्षेत्र नं ७या सभासद् रामवीर मानन्धरयात राजीनामा बिकाः थः उगु निर्वाचन क्षेत्रया उपनिर्वाचनय् उम्मेदवारी बीगु योजना दयेकाच्वम्ह गौतम अन्ततः उगु निर्णयपाखें ल्यूने वंगु दु ।
पार्टीया नेतात नापं क्षेत्र नं ७या प्रदेश सभाया सांसदत नाप जूगु सहलहलय् गौतमं थः आः तत्काल उगु क्षेत्रपाखें उम्मेदवारी मबीगु जानकारी बियादीगु खः । थ्वस्वयां न्ह्यः प्रधानमन्त्री केपी ओली, नेकपा अध्यक्ष पुष्पकमल दाहाल प्रचण्ड लगायतया शीर्ष नेतातय्सं क्षेत्र नं ७या स्थानीय नेतात नाप अनया वस्तु अवस्थाया बारे जानकारी काःगु खः । प्रदेश सभाया सांसदत बसन्त मानन्धर व प्रकाश प्रकाश श्रेष्ठ नापं येँ वडा नं १८या वडा अध्यक्ष न्हुच्छेकाजी महर्जन नाप जूगु सहलहलय् स्थानीय नेतातय्सं उपनिर्वाचनपाखें जनताय् नकारात्मक लिच्वः लाकीगु व उकीं पार्टीयात तःधंगु घाटा जुइगु खँ धाःगु खः ।
सभासद् रामवीरया राजनीमा लिपा पार्टी दुने हे थुकीया आलोचना जूगु खः। रक्षामन्त्री ईश्वर पोखरेल, नेकपाया महासचिव विष्णु पौडेल, नेता भीम रावल लगायतं गौतमया उम्मेदवारीयात कयाः सार्वजनिक रूपं हे असहमति प्वंकाच्वंगु खः । पार्टी दुने हे उम्मेदवारीयात कयाः आलोचना जुइवं गाैतमं थः निर्वाचनय् ब्वति कायेगु मनस्थितियात त्वःतुगु खः । क्षेत्र नं ७या स्थानीय नेतातय् ब्रिफिङ व पार्टी दुने जुयाच्वंगु आलोचनां निर्वाचनय् थः बुइफुगु वाःचायेकाः गौतमं उगु निर्णय याःगु खँ नेकपाया नेतातय्सं धाःगु दु ।
थ्वस्वयां न्ह्यः सभासद् रामवीर मानन्धरं गौतमयात सभासद् दयेकेगु धासें थःगु पदपाखें राजीनामा यायेगु घोषणा याःगु खः । अाः वामदेव गौतमया थुगु निर्णया लिपा रामवीरया राजीनामा पार्टीं लितकाइगु खः वा उपनिर्वाचन याकाः मेम्ह उम्मेदवार छ्वइगु धाःसा निश्चित मजूनी ।
LEAVE YOUR COMMENTS