नासापाखें नेपाली विद्यार्थीं दयेकूगु सर्ट फिल्म पुरस्कृत

येँ – अमेरिकाया न्यूयोर्कय् ब्वनाच्वंपिं छम्ह नेपाली विद्यार्थी दुथ्याःगु पुचलं दयेकूगु एनिमेटेट शर्ट मूभियात अमेरिकी अन्तरिक्ष अध्ययन सम्बन्धी संस्था नासाया प्रोजेक्ट मार्स कार्यक्रमं बीगु न्हापांगु सिरपाः लःल्हाःगु दु ।

नेपाली विद्यार्थी सुविज्ञ बस्नेतया लिसें भारतीय विद्यार्थीत मायुख गोश्वामी व दिव्या मोरं तयार याःगु ‘रेन्डेजभोस मार्स’ नांया उगु शर्ट मूभिं झिद्वः डलरया न्हापांगु सिरपाः त्याकूगु खः ।

मुक्कं साढे ४ मिनेटया उगु मूभिइ छम्ह भारतीय मचां मंगलय् वनेत याःगु कुतः व वयागु म्हगसयात सनिमेटेड बाखंया रुपय् न्ह्यब्वयातःगु दु ।
थुगु सिरपाः त्याकेधुंकाः सुविज्ञं धाःगु दु, ‘जिमिगु निलाया मेहनतया फल चूलाः थें च्वन, थुकिं मेगु मुभि दयेकेत प्रोत्साहित याःगु दु ।’
सिरपाः त्याकेधुंकाः थ्व सर्ट मूभिं अमेरिकाया २७२ गू थिएटरय् छक्वलं प्रदर्शन याःगु खःसा न्हापांखुसी चन्द्रमा थ्यंम्ह निल आर्मस्ट्रया जीवनीइ आधारित फिल्म फस्र्टम्यान लिसें क्यंगु खः ।