कोरोनां जात्राय् अन्यौल

येँ -भारतय् हानं कोरोना महामारी तच्वया वनेवं नेपालय् नं उकिया लिच्वः लाइगु ग्याःचिकुं यानाः न्ह्यःने वयाच्वंगु थीथी जात्रापर्व सञ्चालन यायेगु बारे हानं अन्यौल ब्वलनाच्वंगु दु । आः वइगु चैत वैशाख महिनाय् येँ, यल व ख्वपय् ततःधंगु जात्रा पर्वत न्ह्याकेगु चलन दु ।

थ्वहे झ्वलय् आः तुरुन्त न्ह्याकेमाःगु येँया जनबहाःद्यःया जात्रा यायेगु लाकि मयायेगु धकाः अन्यौल वयाच्वंगु खःसां जात्रालिसे सम्बन्धित निकायं धाःसा थुगुसी जात्रा यायेगु धकाः निर्णय याःगु दु । थगुने कोरोनाया कारणं स्थगित जूगु जनबहाः द्यःया जात्रा थुगुसी यायेगु धकाः निर्णय जूगु खः । थगुने कारोना संक्रमणं यानाः सरकारं यानातःगु लकडाउनया कारणं जात्रा यायेमफुगु खःसा थुगुसी सरकारं लकडाउन यानामतःगु खःसां नं स्वास्थ्य मापदण्ड नालाः जात्रा यायेगु खँ २५ वडाया वडाध्यक्ष निलकाजी शाक्यं ‘नेपालभाषा टाइम्स’ यात कनादीगु दु ।

जनबहाःद्यःया जात्रा यायेगु निंतिं म्हिगः जात्राया रुटय् लाःगु थीथी संस्थालिसे गुथि संस्थानया प्रतिनिधि दथुइ सहलह जूगु खः । सहलहया झ्वलय् जात्रा दिके मजिउ धकाः जनस्तरं हे सुझाव वःगुलिं थुगुसी सुरक्षा मापदण्ड नालाः जूसां जात्रा यायेगु निर्णय जूगु खँ वय्कलं कनादीगु दु ।

जनस्तरं हे जात्रा यायेगु निर्णय जूसां सरकारया गज्याःगु प्रतिक्रिया वइगु खः उकियात ध्यानय् तयाः जात्रा यायेगु खँ नं वय्कलं कनादिल । थगुने जनस्तरं हे जात्रा मयाःसा जिउ धइगु सुझाव वःगुलिं जात्रा स्थगित यानागु खँ कनादिसें वय्कलं थुगुसी धाःसा जात्रा जुइगु विश्वास प्वंकादिल ।

थुगुसी वैशाख ७ गते अष्टमी कुन्हु द्यःयात रथय् बिज्याकीगु ज्याझ्वः दुसा दशमी कुन्हु रथं कुहां बिज्याकाः जनबहालय् च्वंगु द्यःछेँय् हयेगु तयारी जुयाच्वंगु दु ।

उकथं हे थुगुसी ख्वपया तःजिगु बिस्काः जात्रा नं मयायेगु धकाः स्थानीय सुरक्षा निकायतय्सं निर्णय याःगु खःसां स्थानीय जनता व स्थानीय जनप्रतिनिधितय् संस्थां धाःसा उकिया विरोध याःगु दु । उकिं ख्वपय् नं बिस्काः जात्रा यायेगु निर्णय जूगु दुसा उकिया लागिं आवश्यक तयारी नं जूगु दु । थुगुसी बिस्काःया लागिं माःगु यःसिं समेत क्रेनं सालाः हःगु खःसा भैलःद्यःया खः दयेकेगु ज्याय् नं क्रेन छ्यलाच्वंगु दु ।
अथे हे थिमिया म्ये प्वाः खनेगु जात्रा नं मयाये माली धकाः वःगु सुझावयात स्थानीय जनतां खारेज याना बिउगु दु । कोरोनाया महामारी तच्वया वःसां राजनीतिक पार्टीतय्सं ततःधंगु सभा समारोह याये जिउसा सर्वसाधारण जनतां जात्रा पर्व जक छाय् याये मजिउ धइगु तर्क नं स्थानीय मनूतय्सं तयेगु याना हःगु दु ।

सम्बन्धित बुखँ

LEAVE YOUR COMMENTS