अशोकस्तम्भ नापसं देवा च्याकेगु बन्द

येँ (नेपालभाषा टाइम्स)- लुम्बिनीया अशोकस्तम्भ न्ह्यःने देवा च्याकेगु ज्या बन्द याःगु दु । अन च्याकीगु देवाया कुं ऐतिहासिक स्तम्भया पुरातात्विक संरचनाय् लिच्वः लाःगु धासें अन देवा च्याकेत तयातःगु र्‍याक मेथाय् तयेयंकूगु दु । न्हिं सलंसःया ल्याखय् च्याकीगु देवाया कुं अशोकस्तम्भया पुरातात्विक संरचना नष्ट जुइ धासें पुरातत्वविद्तय्सं देवा च्याकेगु थाय् हीकेमाःगु सुझाव बिया वयाच्वंगु खः । उकिं अशोकस्तम्भ नापसं तयाःगु देवा च्याकेगु सेड चीकागु खँ लुम्बिनी विकास कोषया उपाध्यक्ष ल्हारक्याल लामां कनादीगु दु ।

सम्राट अशोकं ई.पु. २४९ स धस्वाकूगु अशोक स्तम्भयात गौतम बुद्धया जन्म लुम्बिनीइ जूगु प्रमाणया रुपय् कायेगु याः । अशोकस्तम्भय् च्वयातःगु शिलालेखय् बुद्ध लुम्बिनीइ बूगु खँ न्ह्यथनातःगु दु ।

उपाध्यक्ष लामां लुम्बिनी म्हसीकेगु अशोकस्तम्भया प्रमाणया हे नष्ट जुइ धइगु विज्ञपिनिगु सुझाव कथं देवा च्याकेगु थाय् हिलागु खँ धयादीगु दु । देवा च्याकेगु थाय् हिलाः कोषं मायादेवी देगःया पश्चिमपाखे दयेकूगु दु । अन छक्वलं हे च्याद्वः देवा च्याकेफइ ।

संयुक्त राष्ट्रया सांस्कृतिक संगठन युनेस्कों सन् २०११ स याःगु अध्ययनय् लुम्बिनी जःखः दयेकूगु उद्योगया धू,कुँ, सिमेन्टया धू व स्तम्भ लिकसं च्याकातःगु देवां अशोक स्तम्भया पुरातात्विक संरचनाय् नकारात्मक लिच्वः लाकूगु खनेदुगु खः ।