याकनं कोरला नाका चालीगु

मुस्ताङ – कोरला नाका चायेकेगु निंतिं चीन व नेपाः सरकारं पूर्वाधार निर्माण यायेगु ज्या तच्वयेकेगु लिसें कुटनीतिक पहल नं तच्वयेकूगु दु ।कोरला नाका संचालनया निंतिं पहुँच मार्ग दयेकेवं सुरक्षा निकायया क्याम्प तयेगु तयारी जुयाच्वंगु दु । कोरला नाका लिक्क लाःगु नेचुङ भन्सार ज्याकू थ्वयां न्ह्यव हे संचालनय् वयेधुंकूगु दुसा चिनिया सरकारं नाका न्यातँजाःगु भवन नं दयेकेधुंकूगु दु ।सन् २०१७ या अक्टोवरय् चिनियाँ राजदूत यु हाङं औपचारिक रुपं कोरला नाका भ्रमण यानादीगु खः ।

मुस्ताङपाखें निर्वाचित जुयादीम्ह प्रतिनिधि सभा दुजः प्रेमप्रसाद तुलाचनं उत्तर दक्षिण स्वाइगु काली गण्डकी करिडोअन्तर्गत बेनी–जोमसोम–कोरला सडक आयो–जनापाखें कोरला नाका स्वाइगु पहुँचमार्गया स्तरवृद्धि ज्या न्ह्यायेधुंकूगु खँ कनादीगु दु । वय्कलं उगु नाका याकनं चायेकेगु निंतिं पहल जुयाच्वंगु खँ धयादीगु दु ।जोमसोमं ११० किलोमिटर उत्तरपाखे लाःगु कोरला नाकाय् सहज रुपं यातायात पहुँच थ्यंकेत आयोजनापाखें न्यागू प्याकेजय् निगू लेनया ग्राभेल सडक दयेकेगु ज्या जुयाच्वंगु दु । थुकिया थ्यंमथ्यं ४० प्रतिशत ज्या क्वचायेधुंकूगु दु । बेनी जोमसोम सडकखण्ड दयेकेत टेन्डर आह्वान जुइधुंकूगु दुसा छुं क्षेत्रय् दयेकेगु ज्या न्ह्यानाच्वंगु दु ।

कालीगण्डकी करिडोर भारत व चीन स्वाइगु नेपाःया दकलय् चिहाकःगु सतक मार्ग खः । कोरला नाकायात लक्ष्य यानाः सरकारं सीमा प्रहरी चौकी व प्रशासन कार्यालय चायेकेधुंकूगु दु । लोमान्थाङ गाउँपालिकाया छोसेरय् नेचुङ भन्सार कार्यालय २१ दँय् लिपा २०७३ असारय् हाकनं पुनस्र्थापना याःगु खः ।आः नेपाली सेना, सशस्त्र प्रहरीया क्याम्प व अध्यागमन कार्यालय तयेगु निंतिं जग्गा कायेगु ज्या पूवनेधुंकूगु दु । लोमान्थाङ निसें कोरला नाकापाखे वनीगु लँय् करिब न्यागू किलोमिटर उत्तरपाखे सेनाया क्याम्प तयेत २०० रोपनी जग्गा काःगु खः । थ्व थासय् सेनां भवन दयेकेगु ज्या नं न्ह्याकेधुंकूगु खँ प्रमुख जिल्ला अधिकारी रामचन्द्र तिवारीं कनादीगु दु । कोरला निसें तिब्बतया मू राजमार्गया बजार क्षेत्र ढुङ्वासेन ४५ किलोमिटर जक तापाः ।