त्रिशुली ‘थ्री बी’ शुरु जुल

येँ – नेपाल विद्युत प्राधिकरण व नेपाल दुरसञ्चार कम्पनी लिमिटेड (नेपाल टेलिकम) या लगानीइ दयेकेत्यंगु ३७ मेगावाटया माथिल्लो त्रिशुली ‘थ्री बी’ म्हिगः छगू ज्याझ्वःया दथुइ ऊर्जा, जलस्रोत तथा सिंचाइ मन्त्री वर्षमान पुनं शिलान्यास यानादिल । ज्याझ्वलय् न्ववासें मन्त्री पुनं आयोजना दयेकेगु ज्या इलय् हे क्वचायेकेत निर्देशन नं बियादिल ।

अथेहे ज्याझ्वलय् न्ववासें प्राधिकरणया कार्यकारी निर्देशक कुलमान घिसिङं आयोजना इलय् हे क्वचायेके फत धाःसा देय्न्यंकं नियमित मत आपूर्ति जुयाः देय्या आर्थिक विकासय् ग्वाहालि जुइगु विश्वास प्वंकादिल । आयोजनाया ठेक्का चिनियाँ कम्पनी सिचुआन एएनएचई हाइड्रो इलेक्ट्रिक इन्जिनियरिङं काःगु खः । आयोजना दयेकेगु ज्या स्वदँया दुने क्वचाइगु खँ धाःगु दु ।

आयोजना २०७७ फागुन २९ गते दुने क्वचायेगु कथं ज्या शुरु जुयाच्वंगु दु । आयोजन दयेकेगु निंतिं ७ अर्ब ४४ करोड तका तुइगु खँ धाःगु दु । आयोजनापाखें सुख्खा यामय् १३ करोड ४८ लाख व वर्षाया इलय् १५ करोड ७७ लाख युनिट मत उत्पादन जुइगु खँ धाःगु दु । आयोजनापाखें उत्पादन जूगु मत मियाः दँय् १ अर्ब ८९ करोड तका आम्दानी जुइगु खँ धाःगु दु ।