सुनचाँदी महासंघपाखें सल्लाहकारपिंत हना

येँ, नेपाल सुनचाँदी व्यवसायी महासंघं नकतिनि क्वचाःगु प्रतिनिधि सभा व प्रदेश सभाय् त्याःपिं महासंघया सल्लाहकार व पुलांपिं सल्लाहकारपिंत हनेज्या याःगु दु ।
महासंघया नायः मोहनकुमार सुनारं पुलांम्ह कानुनी सल्लाहकार सुवास नेम्वाङ व सल्लाहकार कृष्णगोपाल श्रेष्ठयात दोसल्लां न्ययेकाः हनापौ देछासें सम्मान यानादीगु खः । निर्वाचनय् विजयी जुयादीपिं मेपिं सल्लाहकारपिं प्रकाशमान सिंह व छविलाल विश्वकर्मा विशेष कारणं ज्याझ्वलय् थ्यंकेमफुगुलिं वय्कःपिंत छेँय् वनाः सम्मान लःल्हायेगु जानकारी बिउगु खः ।
ज्याझ्वलय् न्ववानादिसें पुलांम्ह सभामुख नेम्वाङ लुँवह व्यवसायीतय् छु समस्या जुयाच्वंगु दु धयागु बारे थम्हं बांलाक सिउ धयादिसें आः थःपिंसं उगु समस्या समाधानया निंतिं पहल यायेगु प्रतिबद्धता प्वंकादीगु खः । महासचिव धर्मसुन्दर वज्राचार्यं न्ह्याकाः अध्यक्ष सुनारं लसकुस यानादीगु ज्याझ्वलय् वरिष्ठ उपाध्यक्ष माणिकरत्न शाक्यं सुभाय् देछायादीगु खः ।